Прв академски час на универзитетите „Св. Кирил и Методиј“ и „Гоце Делчев“

На Универзитетот „Св. Кирил и Методиј“ во Скопје и на Универзитетот „Гоце Делчев“ – Штип денеска ќе се одржат првите академски часови за 2024/2025 година.

Овој настан, како резултат на соработка помеѓу УКИМ и УСС, го означува почетокот на новата академска година и ќе биде одбележан со утринска церемонија, како и со вечерен дел.

Како што соопштија од УКИМ и од УСС, свечениот час вклучува и доделување индекси на најдобро рангираните студенти од секој факултет. Посочуваат дека чинот на доделување – еден индекс на еден студент од секој факултет го симболизира врачувањето на индексите на новата генерација студенти на УКИМ.

Вечерниот дел, е организиран во духот на бруцошка забава, исполнет со звуците на неколку музички точки. Вечерта ќе започне со DJ Dimchuga, а потоа ќе следат настапи на бендовите Siotojazz, The Ringtones, студентскиот бенд УКИМЦИ, како и на пејачите Пајак и Лара. 

Со слоганот „Избери мудро, делувај храбро!“ денеска и Универзитетот „Гоце Делчев“ – Штип го организира првиот академски час „Бруцошка на УГД“. 

Од Универзитетот „Гоце Делчев“ – Штип на првиот академски час го најавија присуството на министрите за образование и наука, Весна Јаневска, за дигитална трансформација, Стефан Андоновски, за енергетика, рударство и минерални суровини, Сања Божиновска, како и градоначалникот на Општина Штип, Иван Јорданов.