Пробиен е тунелот Бренер под Алпите, долг 55 километри, отворањето на железницата за седум години

По повеќе од 15 години изградба, Австрија и Италија го прославија пробивот на железничкиот тунел Бренер, јавуваат странските новински агенции.

Тунелот долг 55 километри ќе ги поврзува Инсбрук во Австрија и Фортеца во Италија под Алпите, а железничката врска се очекува да биде оперативна во 2032 година. Се проценува дека проектот ќе чини 10,5 милијарди евра.

Тунелот Бренер е заеднички проект на Италија, Австрија и ЕУ. Тој е дел од еден од деветте главни коридори во трансевропската транспортна мрежа Тен-Т.

Италијанскиот премиер Џорџија Мелони и австрискиот канцелар Кристијан Штокер присуствуваа на церемонијата на поставување камен-темелник.

Според австриската новинска агенција АПА, Мелони го опиша пробивот како важен чекор во проектот што ќе го олесни „тесното грло“ над превојот Бренер.

Штокер додаде дека тунелот сам по себе нема да ги реши проблемите со транзитот, повикувајќи на дополнителни инвестиции и во патниот и во железничкиот транспорт.

Секоја година, повеќе од 2,5 милиони камиони, 14 милиони возила и 50 милиони тони стока го преминуваат превојот Бренер. Околу 70 проценти од трансалпскиот товарен сообраќај поминува низ Бренер по пат, а само 30 проценти со железница.

Сепак, новата врска би можела да биде доведена во прашање од Германија, која не ги завршила клучните северни пристапни правци до тунелот Бренер.