Поранешен претседател на украинскиот парламент убиен во Лавов

Андриј Парубиј, украински политичар кој беше претседател на Врховната рада и одигра истакната улога во револуцијата на Евромајдан, денеска е убиен во Лавов.

Националната полиција претходно соопшти дека еден политичар бил убиен по пукање во западниот украински град. Ирина Херашченко, пратеничка од партијата Европска солидарност, потоа за Киев Индепендент потврди дека жртвата бил Парубиј.

– Министерот за внатрешни работи Игор Клименко и главниот државен обвинител Руслан Кравченко штотуку ме известија за првите познати околности на страшното убиство во Лавов. Убиен е Андриј Парубиј, соопшти украинскиот претседател Володимир Зеленски на социјалните мрежи и изрази сочувство.

– Сите потребни ресурси се вклучени во истрагата и потрагата по убиецот, додаде Зеленски.

Властите примиле повик за итна интервенција околу пладне по пукањето во јужниот градски округ Франкивски во Лавов, соопшти полицијата. Жртвата починала на лице место.

Службените лица не дадоа коментари за можни осомничени или мотивот на злосторството.