Поддржувачите на Жаир Болсонаро упаднаа во Конгресот и Врховниот суд на Бразил (Галерија)

Поддржувачите на поранешниот бразилски претседател Жаир Болсонаро, кој одби да го прифати неговиот изборен пораз, упаднаа во Конгресот, Врховниот суд и претседателската палата во главниот град во неделата, една седмица по инаугурацијата на неговиот левичарски ривал, претседателот Луис Инасио Лула да Силва.

Илјадници демонстранти ги заобиколија безбедносните барикади, се качија на покривите, кршеа прозорци и ги нападнаа сите три згради, кои се поврзани со огромниот плоштад „Три сили“ во Бразилија. Некои повикаа на воена интервенција или за да се врати на власт екстремно десничарот Болсонаро или да се симне Лула од претседателската функција.

Телевизискиот канал Глобо Њуз ги прикажа демонстрантите како шетаат низ претседателската палата, а многумина ги носат зелените и жолтите бои на националното знаме што исто така го симболизираат конзервативното движење на нацијата, поддржано од Болсонаро.

Бразилскиот претседател Лула да Силва изјави дека сторителите ќе бидат пронајдени и казнети. Полицијата употреби солзавец, но не успеа да ги одбие демонстрантите.

Да Силва – попознат како Лула – рече дека „нема преседан во историјата на нашата земја“ за сцените видени на Конгресот и на Врховниот суд. Тој го нарече насилството „акти на вандали и фашисти“.

Лула ги нападна полицајците на местото на настанот денес – осудувајќи го нивното недејствување кога толпата стана насилна.

„Полицијата воопшто не направи ништо. Само ги пушти демонстрантите“, вели тој.

Претседателот и нареди на националната гарда да дејствува за да го врати редот во главниот град. Тој, исто така, нареди затворање на централна Бразилија – вклучувајќи ја и главната авенија каде што се наоѓаат административните и владините згради – на 24 часа.

Демонстрантите ги скршија прозорците, додека други стигнаа до салата на Сенатот, каде скокнаа на седиштата и користеа клупи како лизгалки.

Не е јасно дали сѐ уште се во зградата.

Снимките на социјалните мрежи покажуваат како демонстрантите извлекуваат полицаец од неговиот коњ и го напаѓаат надвор од зградата.

Лима, 27-годишен производствен инженер, рече: „Треба повторно да воспоставиме ред по овие лажни избори. Тука сум за историјата, за моите ќерки“, изјави таа за агенцијата АФП.

Поранешниот претседател, кој отпатува за САД пред инаугурацијата на Лула, не ги коментираше настаните во неделата. Молчеа и каналите на социјалните мрежи на неговите тројца синови пратеници.

Околу 17:30 часот. по локално време, помалку од три часа по упадот, безбедносните сили се чинеше дека ја враќаат контролата врз претседателската палата и околината на Врховниот суд, додека илјадници демонстранти останаа околу Конгресот и на неговиот покрив.

Инцидентите потсетија на 6 јануари 2021 година и нападот врз а,ериканскиот Капитол од приврзаниците на тогашниот претседател Доналд Трамп. Политичките аналитичари со месеци предупредуваат дека сличен упад е можен во Бразил, со оглед на тоа што Болсонаро посеа сомнеж за веродостојноста на електронскиот систем за гласање на нацијата – без никакви докази. Резултатите беа признати како легитимни од политичарите од целиот спектар, како и од десетици странски влади.

За разлика од нападот во 2021 година во САД, веројатно е дека само малку службеници работеле во бразилскиот Конгрес и Врховниот суд во недела.

Видеата на социјалните мрежи покажаа ограничено присуство на воената полиција на главниот град; еден од нив ги покажа полицајците како стојат додека луѓето влегуваа во Конгресот, а еден го користеше својот телефон за да снима слики.

„Бразилските власти имаа две години да ги научат лекциите од инвазијата на Капитол и да се подготват за нешто слично во Бразил“, рече Маурисио Санторо, професор по политички науки на Државниот универзитет во Рио де Жанеиро. „Локалните безбедносни сили во Бразилија не успеаја на систематски начин да спречат и да одговорат на екстремистичките акции во градот. А новите федерални власти, како што се министрите за правда и за одбрана, не беа во можност да дејствуваат на решителен начин“.

Гувернерот на федералниот округ, Ибанеис Роча, на Твитер потврди дека го отпуштил шефот на јавната безбедност на главниот град, Андерсон Торес.

Поддржувачите на Болсонаро протестираат против изборната победа на Лула од 30 октомври со блокирање патишта, палење возила и собирање надвор од воените згради, барајќи интервенирање на вооружените сили. Многумина од нив тврдеа дека изборните резултати биле лажни или неверодостојни.

„Овој апсурден обид да се наметне нивната волја со сила нема да надвладее“, напиша на Твитер министерот за правда Флавио Дино. „Владата на Федералниот округ обезбеди дека ќе има засилувања. А силите со кои располагаме работат“.

Лидерите од Латинска Америка го осудија насилството.

Чилеанскиот претседател Габриел Бориќ рече дека Бразил ја има својата „целосна поддршка пред овој кукавички и гнасен напад врз демократијата“.

Колумбискиот претседател Густаво Петро рече дека „фашизмот одлучил да изврши државен удар“, додека мексиканскиот министер за надворешни работи Марсело Ебрард рече дека Мексико изразува „целосна поддршка за администрацијата на претседателот Лула, избрана со народната волја“.

Лула моментално е на службен пат во државата Сао Паоло.

Во својот говор на инаугурацијата, тој вети дека ќе ја обнови земјата која е во „страшни урнатини“. (Според агенциите)