Шести ден од потрагата по момче (6) со аутизам во Германија. Го бараат 800 луѓе

Во Германија продолжува потрагата по Аријан, шестгодишното момче со аутизам, кое исчезна во понеделникот во малото гратче Бремерворде, пишува Билд.

Денеска, според германските медиуми, во потрагата по момчето се вклучени 800 припадници на итната помош, а семејството апелирало до жителите на околните градови. Тие бараат од нив да ги прегледаат нивните имоти, градини и летниковци, па дури и големи цевки или тавани, а не ја исклучуваат можноста момчето да се крие некаде.

„Аријан е вешто момче со фантастични инстинкти. Има многу енергија”, велат од семејството. Портпаролот на полицијата вчера изјави дека нема докази за кривично дело.

Претходно германските медиуми објавија дека родителите повикале полиција само три минути по исчезнувањето на момчето.

Во надеж дека ќе го најдат, волонтерите за време на ноќната потрага свиреа детски песни и користеа т.н. „небесни зраци“. Станува збор за фарови кои проектираат зрак светлина кон небото. Затоа сакале да го охрабрат момчето да дојде на локацијата каде што се наоѓаат. Во потрагата по него се вклучени војници, бројни доброволци, кучиња трагачи и дронови, но сè уште нема резултати.