Почнувањето преговори за членство на Украина во ЕУ го отвора прашањето за дискриминација на Западен Балкан

Лидерите на Европската унија во вторник треба да го одобрат започнувањето на преговорите за членство на Украина и Молдавија, што неминовно го поставува прашањето што да се направи за земјите од Западен Балкан, кои се сопнуваат на патот кон Унијата со години и се чувствуваат дискриминирани во однос на Киев и Кишињев, објавуваат медиуми во ЕУ.

Францускиот економски весник „Лезеко“ посочува дека за два дена шефовите на држави или влади на Унијата треба конечно да дадат „зелено светло“ на предлогот на Европската комисија за отворање преговарачка рамка со Украина и Молдавија, „што земјите на Западен Балкан прифати со горчина, бидејќи барањата на Украина и Молдавија за почеток на преговори беа прифатени за само неколку месеци“, пренесе Бета.

„Лезеко“ истакнува дека затоа „земјите пријатели на Западен Балкан во ЕУ бараат, во најмала рака, истовремено да се испратат позитивни знаци до партнерите од Западен Балкан и да се забрза нивниот пат кон Унија“.

Германски „Дојче веле“ посочува дека Унгарија, која цврсто се залага за влез на земјите од Западен Балкан во Унијата, и која од 1 јули го презема претседавањето со ЕУ, „ќе се залага за конзистентна политика на проширување заснована на заслуги“, како што ја претстави унгарскиот министер за Европа Јанош Бока, објаснувајќи ја програмата на унгарското претседателство во работите на европските 27.

„Лезеко“ посочува дека и унгарскиот министер Бок изјавил дека ЕУ мора да испрати позитивни пораки до Западен Балкан и да го промовира нивниот напредок.

Весникот на француските деловни кругови потсетува дека на поттик на Австрија „од седум членки на Унијата е формиран клубот на пријатели на Западен Балкан кои бараат забрзано вклучување на тој регион во членството на европските 27“.

„Лезеко“ додава дека тие членки на ЕУ, а тоа се „Австрија, Грција, Италија, Хрватска, Словачка, Словенија и Чешка, сметаат дека доколку нивното членство биде суспендирано, балканските земји би паднале под зголеменото влијание на непријателските земји, како што е Кина“.

Францускиот весник истакнува дека Шарл Мишел, претседателот на Европскиот совет, заклучил дека земјите од Западен Балкан треба да се приклучат на членството до 2030 година.

„Европските дваесет и седум тогаш презентираа дека тоа не може да се постигне без длабока реорганизација на институциите на ЕУ и промени во структурата на буџетот на Унијата“, наведува „Лезеко“.

Шефовите на држави или влади на Унијата во вторник на самитот во Брисел ќе побараат од Европската комисија да презентира предлози токму за ова прашање, најдоцна до средината на 2025 година.