„Пари“: Како функционира железничкиот сообраќај – патниците не ѝ дадоа ниту тројка на железницата

Ако во 2018 година сме имале 540.066 патници во железничкиот сообраќај, лани нивниот број е преполовен – превезени се 280.440 патници. Состојбата се пресликува и во реализираните возни километри во патничкиот сообраќај. Пред 5 години биле реализирани речиси 1,3 милиони километри, а лани само 597.000 километри, покажуваат податоците од извештајот на Агенцијата за железнички сообраќај. Ланската анкета на патници, пак, покажува дека тие ги оцениле услугите во железничкиот патнички сообраќај со 2,97 на скала од 1 до 5, покажува извештајот на Агенцијата за регулирање на железничкиот сектор.

 

 

Железничкиот сообраќај и во превоз на стока, за што веќе пишуваше Пари, и во превоз на патници ја губи својата функција. Место да се развива, како што е тренд во сите европски развиени земји, нашиот железнички сообраќај постепено гасне. Патниците веќе и не го земаат многу предвид железничкиот сообраќај. Кога патуваат, им одговара цената на Железницата во однос на автобускиот превоз, но железничките патешествија коишто може да значат и поминати неколку часа возење за 50-тина километри, за кои многу често има реакции во јавноста, очигледно ги одвраќаат од одлуката да се качат во воз. Во намалувањето на бројот на патници, секако, влијае и бројот на возни линии, кои исто така доживуваа негативни турбуленции.

 

Во 2023 година Агенцијата направи анкета за почитување на правата на патниците во железничкиот сообраќај. Анкетата е направена на репрезентативен примерок од 504 патници во воз или на железничка станица.

 

„Со оваа анкета се опфатени две од предвидените четири железнички линии во двата правца. Железничките линии Скопје ‒ Кичево, Кичево ‒ Скопје и Скопје ‒ Кочани, Кочани ‒ Скопје не се опфатени од објективни причини, поради тоа што во периодот на спроведување на Анкетата не беа во функција“, пишува во Извештајот.

На прашањето: „Зошто ја користите Железницата?“ 56 насто одговориле дека тоа е поради цената. Во 2017 година ваков одговор дале дури 90 насто од патниците. Другите можни опции за одговор биле дека тоа е единственото превозно средство од нивната дестинација, за што лани рекле 4 насто од испитаниците, на 28 насто им одговарал возниот ред, 6 насто рекле дека се возат поради услугата, и 6 насто се изјасниле за „друго“.

На прашањето: „Дали сте информирани за своите права?“, 71 насто од испитаниците одговориле негативно.

Според анкетираните патници, времето на тргнување на возовите значително се подобрило лани во однос на порано. Така, дури 95 насто од испитаниците рекле дека возот им тргнува навреме. Во 2010 година ваков одговор дале само 43 насто од испитаниците. Пониски проценти имало и во блиско минато ‒ 75 насто во 2022 година, 74 насто во 2021 година, но во 2019 година, исто така, имало 95 насто.

Сепак, Железницата не доби ниту тројка за стандардите. На скала од 1 до 5, оценката за квалитетот на услугите што се добиваат при патувањето е 2,91. Таа оценка е подобра отколку во 2022 година, кога патниците ја оцениле Железницата со 2,76, а е полоша отколку во 2021 година, кога ја оцениле со 3,23.

Во врска со стандардот, за хигиената во вагоните патниците лани дале оценка 2,51, хигиената во санитарните јазли ја оцениле со 2,34, а загреаноста во зимски услови со 3,69.

Во прилог ЛИНК до целата анализа.