На спортските терени и паркови во Велес се поставува видео надзор

 Со цел заштита на урбаната опрема   поставени  се камери за 24 часовен видео надзор на спортските терени кај ООУ „Васил Главинов” во Велес. Како што информираат од локалната самоуправа, во наредниот период ќе бидат поставени камери и на други локации во градот.

– Чувај го градот убав, не ја уништувај урбаната опрема наменета за сите, порачуваат од Општина Велес.

Инаку видео надзор од страна на Општина Велес се поставува на упорно повеќегодишно барање од новинарите и граѓаните кои се загрижени што поединци – вандали  и групи  секојдневно  ја уништуваат новата опрема и спортските терени во градот.

Голем број од граѓаните во разговор за МИА, ја поддржуваат ваквата акција на Општина Велес и посочуваат вандалите на урбаната опрема да бидат фатени од полицијата и казнети од судот и да платат глоба да се поправи скршеното.

Воедно на голем дел од реновираните спортски терени во градот и парковите уништена е урбаната опрема и спортските терени каде несовесни возат мотори, велосипеди и тротинети  и го уништуваат тартанот на спортските терени за игра.

Претходните градоначалници, на упорните долгогодишни барања на велешките новинари  да се постави видео надзор на спортските терени,  и парковите, тие тогаш  се правдаа дека со закон било забрането да постави видео надзор бидејќи  се рушела приватноста на граѓаните.