Мијалков сепак излегува од затвор
Сашо Мијалков излегува од притвор, пренесува „А1он“, откако според медиумот му е уважена жалбата од Апелациониот суд , по одлуката на Кривичниот суд кој му одреди дополнителна мерка притвор за „Плацови на Водно“.
Засега се уште не е познато дали одлучувал истиот состав на Кривичен совет или некој од членовите барале наместо нив да одлучи нивната замена.
Се очекува Мијалков вечерва да биде дома.
Решението од второстепениот суд е испратено до Основниот кривичен суд од каде се очекува истото да биде доставено и до затворот „Скопје“ во Шуто Оризари каде тој ја издржува мерката притвор.
За Мијалков во моментов има активна гаранција од 11.106.501 евро. Таа беше понудена како гаранција дека нема да избега заедно со жалбата што неговите адвокати ја поднесоа за притворот кој тој претходно го имаше во случајот „Трезор“ каде тој првостепено е осуден на осум години затвор.
Апелација ја прифати гаранцијата и го укина притворот минатата среда, но ексшефот на УБК не излезе од Шутка затоа што Обвинителството за гонење организиран криминал и корупција истиот ден побара друг за притвор, но за случајот „Плацови на Водно“ каде тој е еден од обвинетите, којшто притвор беше одобрен од Кривичниот совет во Основниот кривичен суд.
На ваквата одлука, одбраната поднесе жалба до Апелација повикувајќи се на веќе правосилното решение за укинување на притворот со гаранцијата од 11,1 милион евра. Апелација денеска одлучи да ја прифати жалбата и да го укине и овој притвор.