Мицкоски сериозно размислува за дополнителни даноци за немажени и неженети
Премиерот Христијан Мицкоски објави дека Владата сериозно размислува да воведе дополнителни даноци за немажените и неженетите граѓани во државата, денеска на дебатата за „Демографски трендови, предизвици и можни решенија“.
„Се раѓаат помалку деца, населението старее, а младите се во потрага на подобар живот надвор од границите. И ние не сме исклучок, но нашата состојба е посебна. Додека некои држави ја забележуваат како тренд, кај нас се смета како аларм“, рече Мицкоски и додаде:
„Се надевам министерке Јаневска дека оваа година во читанките нема да биде јас, мама и тато, туку ќе биде јас, мама, тато, бато и дада“, изјави премиерот пред присутните во Влада.
Премиерот обвини дека проблемот не бил третиран соодветно од претходните влади, кои, како што рече, го ставале проблемот под тепих, наместо на него да гледаат како на сериозна закана. Додаде дека актуелната влада не го премолчува проблемот, туку го препознава, именува и се бори со него. Најави мерки и борба против падот на населението и наталитетот во државата.
„Затоа велиме дека е време за иднина, време е за држава каде што ќе се раѓаат повеќе деца, повеќе млади да стапуваат во брак и да се раѓаат повеќе деца, а оние кои се иселени да се вратат. Едгар Моран рекол: Демографијата не е судбина, туку огледало. Прашањето е што ќе видиме во него, и дали ќе имаме храброст да дејствуваме“. Ние веќе гледаме и веќе дејствуваме, затоа што доаѓа времето на народот и граѓаните, и тоа нема да биде време на заминување, туку на враќање, не на тишина, туку на нови гласови, не на исчезнување, туку на раѓање“, изјави Мицкоски.
Додаде дека во 2024 година се родиле 16.061 деца, а починале 20.201 лица и напомена дека тоа е природен пад од 4.140 луѓе за само една година.
-Во последните четири години, изгубивме повеќе од 33.000 жители, како да исчезна еден град од големина на Кавадарци или Кичево. Стапката на наталитет падна од 12,5 процентни промили во 2010 година на само 8,8 во 2024, истакна премиерот.
Тој додаде дека во многу општини и села веќе нема ниту прво одделение, сè повеќе луѓе живеат сами, сè помалку стапуваат во брак, сè помалку деца се раѓаат.