Мехмедовиќ: Сѐ може да се сокрие, но не може да се сокрие кога некој ќе почине

Во текот на овие две години вирусот се измени, а вакцината е создадена врз основа на првиот сој. Ако сега не постигнеме колективен имунитет, ќе го стиснеме копчето за ресет и ќе се вратиме во јануари 2020 година, истакна портпаролот на Комисијата за заразни болести, д-р Злате Мехмедовиќ.

– Мојот став за вакцинацијата, за училиштата, за тоа како треба да се следи пандемијата произлегува од искуствата на другите земји каде што прво поминуваа брановите на вирусот. Треба да го знаете имунитетот на популацијата за да носите мерки. Во Австрија, на пример, се брза да се постигне колективен имунитет, а таму е задолжителна вакцинацијата за сите. Во текот на овие две години вирусот се измени, а вакцината е создадена врз основа на првиот сој. Ако сега не постигнеме колективен имунитет, ќе го стиснеме копчето за ресет и ќе се вратиме во јануари 2020 година, рече Мехмедовиќ на Утрински брифинг.

Во врска со типот на вакцина, Мехмедовиќ вели дека официјалната политика на државата е третата вакцина да биде Фајзер. Тој посочува дека дезинформациите што се објавуваат на социјалните мрежи направија сериозна штета и резултатот од тоа го гледаме денес.

На прашањето зошто во нашат држава има загрижувачки бројки на починати, Мехмедовиќ вели дека ќе бидат преразгледани сите бројки.

– Да, точно е дека имаше манипулација со бројките, но за ова ќе се разговара на Комисијата за заразни болести. Факт е дека нашата земја е на шесто или седмо место во светот по број на починати. Се работи за регистер на починати на Министерството за здравство, кој не се води во реално време, туку се води по пријави од матичните лекари. Станува збор за бавна администрација и ништо повеќе од тоа. Сѐ може да се сокрие, но не може да се сокрие кога некој ќе почине, вели Мехмедовиќ.

Не долго по завршување на емисијата, д-р Мехмедовиќ со објава на Фејсбук образложи  дека не станува збор за манипулација од страна на Комисијата во однос на фактичката бројка, туку дека станува збор за начинот на кој се интерпретираат бројките во јавноста.

-Долго време се разговараше на темата дека во ковид евиденцијата се водат и починатите од друга болест или несреќен случај кај кои е посмртно докажан присуство на коронавирусот, а тоа може да биде и причина за големата смртност, и тоа е нешто за што ќе се отвори дискусија на Комисијата за заразни болести. Комисијата за заразни болести водела точна евиденција согласно препораките на СЗО за смртноста и не станува збор за манипулации на тие бројки, туку за манипулациите и дезинформациите во јавноста поврзани со смртноста за која основната причина е ковид. Зборот манипулација беше погрешно употребен и требаше да биде дообјаснет, на Комисијата за заразни болести и се извинувам за недоразбирањето, напиша Мехмедовиќ.

Тој потенцира дека носењето на протоколи е работа на Министерството за здравство, а не на Лекарската комора, но дијалог меѓу институциите мора да има. Посочува дека ќе ги видат досегашните упатства и начинот на кој се дисперзирани кај лекарите. Мехмедовиќ истакна дека упатство за практикување на медицина базирана врз докази е она што популарно се нарекува „протоколи“ и тоа треба да се применува.

– Во моментов притисокот врз болниците е голем и сериозен, но засега ситуацијата се држи под контрола. Засега треба да се користат постојните болнички капацитети, а се надевам дека нема да дојдеме во ситуација да мораме да ги искористиме сите капацитети, вклучително и модуларните болници кои мора да бидат безбедни и да имаат доволен број персонал во ситуација кога имаме голем број заразени медицински работници, вели Мехмедовиќ.

Д-р Злате Мехмедовиќ, кој вчера беше избран за портпарол на Комисијата за заразни болести, истакна дека неговата позиција, исто како и членувањето на другите експерти, е неплатена и дека е потребна за информирање на популацијата која е склона да се приклонува кон непроверени информации и теории на заговор.