Кремљ ги нарече „конфронтациски“ европските повици за 30-дневен прекин на огнот во Украина

 Кремљ ги обвини европските земји за контрадикторни и конфронтациски изјави откако европските лидери го поддржаа американскиот план за 30-дневен прекин на огнот во Украина и ѝ се заканија на Русија со „масовни санкции“ доколку не се придржува кон него. 

„Слушаме многу контрадикторни изјави од Европа. Генерално, тие се поконфронтациски по природа од оние ориентирани кон обид за оживување на нашите односи. Претседателот Владимир Путин постојано изјавуваше дека е подготвен за контакти со сите лидери. Тој е отворен за интеракција, за дијалог со сите лидери, доколку самите лидери се подготвени“, изјави денеска портпаролот на Кремљ, Дмитриј Песков. 

Украина и европските лидери се согласија дека безусловниот 30-дневен прекин на огнот треба да почне в понеделник. Тие рекоа дека имаат поддршка и од американскиот претседател Доналд Трамп.

„Сите ние тука, заедно со САД, го повикуваме Путин. Ако тој има сериозна намера да постигне мир, има шанса да го покаже тоа“, рече британскиот премиер Кир Стармер.