Комисијата за заразни болести даде конечен предлог за наставата

По заклучокот од седницата на Владата во вторникот Планот на МОН за учебната 2020/2021 да биде споделен со Комисијата за заразни болести и таа да го даде мислењето за моделот на настава, Комисијата вчера на состанок донесе конечен предлог кој сега ќе треба да биде разгледан од Владата и таа да ја донесе одлуката како ќе работат училиштата од 1 септември.

Предлогот е учебната година да почне онлајн, со два исклучока – првиот е за учениците од прво до трето одделение, за кои се предлага да ја следат наставата со физичко присуство, земајќи го предвид социоемоционалниот аспект и нивната возраст, а вториот исклучок се училиштата со мал број ученици по паралелки – наставата да ја организираат со присуство во училниците ако тоа го дозволува епидемиолошката состојба.

Заменик-министерката за образование и наука Елизабета Наумовска претпладнево за МИА изјави дека Координативниот кризен штаб од МОН побарал да ги приспособи протоколите за моделите на настава врз основа на предлогот на Комисијата и да достави податоци колку се на број училиштата со помал број ученици кои би организирале настава со физичко присуство, во кои општини се наоѓаат, нивните просторни услови итн. Наумовска рече дека работните групи на МОН се во комуникација со Штабот и откако протоколите ќе се усогласат со предлогот од Комисијата, тој ќе биде ставен на дневен ред на седница на Владата, веројатно идната недела.

Министерот Арбер Адеми, кој е на ставот дека училиштата треба да бидат отворени секаде каде што состојбата со вирусот е стабилна, смета дека предлогот на Комисијата за заразни болести е компромис на две различни гледишта – ставот на МОН за физичко присуство и ставот на здравствените авторитети – онлајн-настава. Според него, предлогот на Комисијата е добра насока за изнаоѓање најсоодветен модел за настава.

Трите модели што ги содржи Планот на МОН се: настава со физичко присуство со мерки за заштита – маски и растојание од најмалку 1,5 метар помеѓу учениците во училница, далечинско учење или онлајн-настава, и комбинирана настава – пред сè за училиштата со голем број ученици. Комбинираниот модел предвидува учениците да бидат поделени на помали групи – една група која би следела настава со физичко присуството една недела, а во исто време другата група ученици, како и хроничко болните, би го следела часот онлајн. Ако е невозможно во реално време, тогаш лекциите од денот ќе се снимаат и ќе се споделат со таа група ученици преку платформа за учење.

Подготвените предлог-протоколи имаат конкретни упатства за различни ситуации и услови, за бројот на ученици во паралелка, скратување на наставните часови (предлогот е од 40 на 30 минути во основно, односно од 45 на 35 минути во средно) итн.

На прес-конференција пред два дена Адеми укажа дека е можно одложување на почетокот на учебната година затоа што кој модел и да се избере, ќе треба да се направат измени на законите за основно и за средно образование, а за тоа е потребно функционално Собрание.

Наумовска за порталот „факултети.мк“  објасни како тоа ќе изгледа:

„Во подрачните училишта во руралните средини има по 5-6 ученици кои и така по цел ден играат заедно. Генерално, на тие места има послаб интернет. Ако не постојат индикации за Ковид-19, нема логика за нив да инсистираме на онлајн-настава. Тоа важи и за селата и градовите каде што има солидна епидемиолошка состојба.

Втората опција е комбинирана настава. Одделенијата да се поделат на половина. Едната половина една недела ќе оди во школо, а ќе се почитуваат сите протоколи – носење маска, држење дистанца, по еден ученик во клупа итн. Часот ќе се пренесува преку камера и компјутер за сите останати ученици што се дома во реално време да ја следат наставата во живо. Третиот модел е целосна настава од далечина, но наставниците да ги држат часовите од училница, во реално време и да се пренесуваат до секој ученик.
– Наставниците така нема да бидат во ризична ситуција, нема да имаат контакт со ученици. Но, мора да одат на работа. Имаше многу совесни наставници во последното тримесечје, но имаше и такви што едвај им испратија три е-пораки на учениците. Тоа не треба да го дозволиме – вели Наумовска. Во последниот модел, според неа, треба да се дозволи ако некој ученик нема можност за онлајн-настава, здрав е и живее блиску до школото, да може да ја следи наставата во училница.Наставниците со хронични болести кои нема да можат физички од училница да држат настава ќе останат дома и нема да работат“, објасни Наумовска.

 

На прашањето како ќе се пренесуваат часови на интернет од училница кога училиштата располагаат со оскудна технологија, Наумовска вели:

– Опремата од проектот „Компјутер за секое дете“ е целосно застарена и нефункционална. Идејата е да има лаптоп со камера во секоја училница. „Македонски телеком“ веќе прави испитувања каков интернет има во училиштата. Ние имаме списоци колку училишта имаат потреба од компјутери, чекаме податоци по колку училници има за да се обезбеди опремата .