Кои се најлуксузните аеродроми во светот?

09/08/2021 12:03

За првпат по речиси една деценија, аеродромот „Чанги“ во Сингапур го загуби своето место на врвот на годишното рангирање на „Скајтракс“ за најдобрите светски аеродроми.Меѓународниот аеродром „Хамад“ во Доха, кој со години се искачуваше, беше награден со првото место во 2021 година во категоријата „Најдобар светски аеродром“.

Оваа година, „Чанги“ се најде на третото место-достигнување за секој друг аеродром, но можеби не од перспектива на неговите суперфанови, кои редовно ја пофалуваат леснотијата, удобноста и опциите за врвна храна и пијалоци на аеродромот.

Напредувањето на Доха е резултат на напорната работа на неговата водечка авиокомпанија, „Катар ервејс“. Владата на Катар инвестираше многу и во својот национален авиопревозник и во својот аеродром, со прилично спектакуларни резултати.

Патниците на „Катар ервејс“ кои имаат конекции преку овој аеродром можат да уживаат во бесплатни тури низ градот, бесплатно сместување и храна (во зависност од должината на трансферот) и услуга за пренос на ВИП, кога вработените на авиокомпанијата ги водат патниците низ на аеродромот во правец на нивниот следен лет.

Аеродромите во Европа и Азија доминираат со остатокот од листата во 2021 година. Јапонија има дури три аеродроми на листата, вклучувајќи ги и двата аеродроми во Токио („Нарита“ и „Ханеда“).