Израелските војници соблекувале, понижувале и малтретирале медицински персонал во Газа

Палестинскиот медицински персонал во Газа изјави за Би-Би-Си дека им биле врзувани очи, биле приведени, постојано тепани и принудени да се соблекуваат од израелските војници по рацијата во нивната болница минатиот месец.

Ахмед Абу Саба, лекар во болницата Насер, опиша дека бил држен една недела во притвор, каде што, како што рече, му биле поставени кучиња со муцка, а израелски војник му ја скршил раката. Неговиот опис многу се совпаѓа со тој на двајца други медицински лица кои сакаа да останат анонимни поради страв од одмазда.

Тие за Би-Би-Си изјавија дека биле понижувани, тепани, полеани со ладна вода и принудени да клечат во непријатни позиции со часови. Тие рекоа дека биле во притвор со денови пред да бидат ослободени.

Би-Би-Си достави детали за нивните наводи до израелските одбранбени сили (ИДФ). Тие не одговорија директно на прашањата, ниту негираа конкретни тврдења за малтретирање. Но, тие негираа дека медицинскиот персонал бил повреден за време на нивната операција.Тие рекоа дека „секоја злоупотреба на затворениците е спротивна на наредбите на ИДФ и затоа е строго забранета“. Владата на Велика Британија повика на истрага по извештајот на Би-Би-Си од Газа.

ИДФ изврши рација во болницата во градот Кан Јунис, јужниот дел на Газа, – која беше една од ретките во појасот што сè уште функционираше – на 15 февруари, велејќи дека разузнавачките служби покажуваат дека во болницата се сместени оперативци на Хамас. Тие, исто така, рекоа дека таму биле држени израелски заложници земени од Хамас на 7 октомври – а некои од самите заложници јавно кажаа дека биле чувани Насер. Хамас негираше дека неговите борци дејствуваат во медицински установи.

Снимките тајно снимени во болницата на 16 февруари, денот кога медицинските лица беа приведени, беа споделени со Би-Би-Си.На нив се гледаат редица мажи соблечени до долна облека пред зградата за итни случаи на болницата, клекнати со рацете зад главата. Пред некои од нив лежат медицински наметки.

„Секој што се обидел да ја движи главата или да направи некакво движење, бил погоден“, изјави генералниот директор на болницата, д-р Атеф Ал-Хут, за Би-Би-Си. „Тие ги оставија околу два часа во оваа срамна положба“.

ИДФ изјави за Би-Би-Си: „По правило, за време на процесот на апсење, често е неопходно осомничените за тероризам да ја предадат својата облека за да може да се пребара нивната и да се осигура дека не кријат експлозивни елеци или друго оружје. Облеката не им се враќа веднаш на приведените, поради сомневање дека може да сокријат средства што може да се користат за непријателски цели (како што се ножеви)“.

Медицинскиот персонал рече дека потоа биле однесени во болница, тепани, а потоа пренесени во притвор, и сето тоа време биле соблечени. Тие рекоа дека  другите казнивклучувале лежење на стомак подолго време и одложување на оброците. Д-р Абу Саба рече дека бил приведен и претепан од израелските сили по рацијата во болницата Насер.

Експерт за хуманитарно право рече дека снимката и сведочењето на медицинскиот персонал со кој Би-Би-Си разговараше се „крајно загрижувачки“. Тој рече дека некои од снимките доставени до Би-Би-Си „многу јасно преминуваат во категоријата на сурово и нехумано постапување“.

Д-р Лоренс Хил-Которн, ко-директор на Центарот за меѓународно право на Универзитетот во Бристол, рече: „Тоа се коси со она што долго време беше многу фундаментална идеја во законот што се применува во вооружените конфликти, а тоа е дека болниците и медицинскиот персонал се заштитени. Фактот како тие ги третираат државјаните на непријателската страна не треба на кој било начин да ја поткопува нивната заштита“, рече тој.

Би-Би-Си добиле имињата на 49 медицински лица од Насер, за кои се вели дека биле приведени. Од нив, 26 биле именувани од повеќе извори, вклучително и медицински лица на терен, Министерството за здравство управувано од Хамас, меѓународни групи и семејствата на исчезнатите.

Лекарите кои останаа во Насер велат дека операцијата на ИДФ во болницата ги оставила неспособни да се грижат за пациентите. Кога ИДФ ја презеде контролата, скоро 200 пациенти се лекуваа таму, многу од нив „приковани за кревет“. Повеќе медицински лица рекоа дека 13 пациенти починале во деновите по преземањето на Израел. Тие рекоа дека многу од тие пациенти умреле поради условите во болницата, вклучително и недостигот на струја, вода и други основни работи потребни за да работи Насер. Не можеме самостојно да го потврдиме ова. Лекар сподели фотографии од тела во кеси на кревети за кои потврдивме дека се направени во одделение во болницата.

ИДФ изјави за Би-Би-Си дека „и обезбедила на болницата стотици оброци со храна и алтернативен генератор што ѝ овозможил да продолжи да функционира и да ги лекува пациентите во неа“.

Ослободените затвореници и други медицински лица изјавија за Би-Би-Си дека зградата на породилиштето, наречена Мубарак, станала место каде ИДФ го испрашувал и тепал персоналот. Д-р Абу Саба рече дека првично бил избран да остане со пациенти, но подоцна бил одведен во Мубарак, кој, како што рече, станал „ место за мачење“.

„Ме ставија на стол и тоа беше како бесилка“, рече тој. „Слушнав звуци на јажиња, па помислив дека ќе ме погубат.Потоа скршија шише и тоа [стаклото] ми ја пресече ногата и ја оставија да крвари. Потоа почнаа да носат лекар по лекар и почнаа да ги ставаат еден до друг. Ги слушав нивните имиња и нивните гласови“. ИДФ изјави за Би-Би-Си дека „не спроведува егзекуции на затвореници и ги отфрла таквите тврдења“.

Сите тројца уапсени со кои разговараше Би-Би-Си изјавија дека биле набиени на воени возила и тепани додека ги превезувале во голема група. Војниците ги тепале со стапови, црева, кундаци од пушки, велат тие.

„Бевме голи. Носевме само боксерки. Не натрупаа еден врз друг и не изнесоа од Газа“, изјави еден од медицинските лица кој сакаше да остане анонимен. „По целиот пат нѐ удираа, нѐ колнеа и понижуваа. И нѐ полеваа со студена вода“.

Д-р Абу Саба рече дека за време на патувањето војниците ги извадиле уапсените од возилото.

„Не одведоа на парче земја покриена со чакал, не принудија да клекнеме, а очите ни ги залепија… Имаше јама во земјата и мислевме дека ќе не погубат и ќе не закопаат овде. Сите почнавме да се молиме. “

Двајцата други ослободени рекоа дека во одредена фаза им биле дадени лекарски прегледи, но без лекови. Еден рече дека наместо да се лекува за повреда, војник на ИДФ го удрил таму каде што бил повреден.

Д-р Абу Саба изјави за Би-Би-Си дека затворениците рутински ги казнувале.

„Во еден момент, превезот малку се помести надолу, а рацете ми беа врзани со лисици одзади и не можев да го поправам. Ме одведоа да ме казнат. Стоев со кренати раце над мојата глава и со лицето гледав надолу три часа. Потоа, војник ме замоли да дојдам кај него. Кога го направив тоа, тој продолжи да ме удира со раката додека не се скрши“.

Подоцна истиот ден, тој бил одведен во тоалет, претепан и му поставиле кучиња до муцка.Еден ден потоа израелски лекар му ставил гипс, а потоа војниците нацртаа Давидова ѕвезда на него.Би-Би-Си потврди дека д-р Абу Саба направил рендген и побарал третман за скршената рака во полската болница во Газа по притворот, и дека таму пристигнал во гипс со нацртана Давидова ѕвезда.