Истражување: Седум часа сон се идеални за оние над четириесет години

Од искуство знаеме дека денот на работа ќе ни биде тежок по долгото ноќно излегување, но иако звучи парадоксално, повеќе сон не е нужно добар за средовечните и постарите луѓе, покажа студијата објавена во списанието Nature Aging.

Истражувачите од британскиот универзитет во Кембриџ и Универзитетот Фухан во Шангај откриле дека седум часа сон е идеален за средовечни или постари луѓе и заклучиле дека повеќе или помалку сон може негативно да влијае на нивното ментално здравје и да предизвика послаби ментални перформанси.

Истражувачите проучувале податоци за 500.000 возрасни лица на возраст меѓу 38 и 73 години, собрани од огромната база на податоци на Обединетото Кралство Биобанк.

Испитаниците одговарале на прашања за режимот на спиење, менталното здравје и општата состојба и ги пополниле когнитивните тестови. Истражувачите имаа пристап до МРИ снимки на мозокот и генетски податоци на речиси 40.000 субјекти, пренесе СЕЕбиз.

Времетраењето на спиењето влијае на когнитивните перформанси

Научниците открија дека премногу или премалку сон е поврзан со намалени когнитивни перформанси. Испитаниците побавно решаваа тестови, имаа пократок опсег на внимание и послабо решавање на проблеми. Нивното ментално здравје исто така беше полошо, при што повеќето доживеаја зголемување на анксиозноста, симптомите на депресија и влошување на општата состојба.

Тие објаснија дека нарушувањата за време на „плиткото“ спиење (составен дел на длабокиот сон) се можна причина за намалени когнитивни перформанси. Тие се поврзани со акумулација на бета-амилоидни молекули. Се смета дека овие протеински наслаги, чии големи акумулации се наоѓаат во мозокот на пациентите со Алцхајмерова болест, придонесуваат за смрт на невронските клетки.

Анализата на снимките на мозокот исто така покажа дека постои врска помеѓу нерамномерното спиење и разликите во структурата на мозочните региони вклучени во когнитивната обработка и меморијата. Меѓу нив е хипокампусот, кој се смета за центар на меморијата.

Премалку или премногу сон е можен фактор на ризик во староста

Истражувачите откриле дека редовните седум часа сон во текот на ноќта се идеални за когнитивни перформанси, општа благосостојба и ментално здравје кај средовечните и постарите луѓе.

Иако студијата не ја објасни причинско-последичната врска, резултатите покажуваат дека премалку или премногу сон може да биде фактор на ризик за когнитивен пад во повозрасно доба, велат истражувачите.

„Не можеме со сигурност да кажеме дека премалку или премногу сон предизвикува когнитивни проблеми, но анализата во која проучувавме неколку поединци во долг временски период ја потврдува оваа теза“, рече професорот Џианфенг Фенг од Универзитетот Фудан во Кина во соопштение за печатот.

„Причините зошто постарите луѓе имаат послаб сон се сложени и се под влијание на нашата генетика и структурата на мозокот.

Коавторката Барбара Сахакијан од Универзитетот Кембриџ додаде: „Добриот сон е важен во сите фази од животот, но особено како што старееме. Пронаоѓањето начини за подобрување на спиењето може да биде од клучно значење за одржување на добро ментално здравје и избегнување на когнитивниот пад кај постарите луѓе, особено оние кои страдаат од ментални нарушувања и деменција“.

Проблемите со сонот се во пораст кај сите возрасни групи

Според Германското здружение за истражување и медицина за спиење (DGSM), постарите лица често пријавуваат тешкотии со спиењето, пократко вкупно времетраење на спиењето, повеќе дремки во текот на денот и зголемена употреба на апчиња за спиење.

Сепак, сè повеќе проблеми со спиењето се јавуваат кај сите возрасни групи ширум светот.

Само во Германија, во истражувањето на осигурителната компанија Techniker-Krankenkasse од 2017 година, една третина од испитаниците се пожалиле на тешкотии со спиењето, додека секој друг испитаник рекол дека спие шест часа на ден или помалку. Според инструкциите објавени од Националната фондација за спиење на САД (NSF), возрасните треба да спијат од 7 до 9 часа во текот на ноќта. Но, потребната должина на спиење може да варира од личност до личност, заклучуваат тие.