Инспекторите ќе ги проверуваат сместувачките објекти во Охрид, ќе казнуваат ако се издаваат

Продолжувањето со рестриктивните мерки за спречување на ширењето на епидемијата на коронавирусот значи дека се уште не е либерализирана понудата на сместувачки капацитети во туристичките центри во земјата. Тоа значи дека се уште е на сила целосната забрана за работа на сместувачките капацитети, како за поголемите објекти така и за приватните станоиздавачи.

Од Пазарниот инспекторат во Охрид, како најпосетена туристичка дестинација во земјата, најавуваат дека во текот на престојниот продолжен викенд продолжуваат со контроли на сместувачките капацитети, со цел почитување на мерките за спречување на ширење на заразата.

Согласно мерките што се уште се на сила, изнајмувањето објекти или соби за сместување претставува кривично дело за што е предвидена и висока парична казна, која за приватните лица започнува од две илјади евра, па и повеќе зависно имотната состојба и примањата на прекршителот, додека за правните лица предвидена е соодветна постапка,а висината на казната ќе ја одредува Судот на предлог на јавен обвинител.

Граѓаните на Охрид преку социјалните мрежи изразија загриженост од можен наплив на гости за викендот од кризните жаришта каде наредните денови на викендот е на сила целосна забрана за движење.