Ѓоковиќ е веќе опериран, Вимблдон го пропушта, Олимпијадата е неизвесна

Новак Ѓоковиќ денеска е на операција на коленото. Српскиот тенисер го повреди менискусот на десната нога и затоа без борба во четвртфиналето се повлече од Ролан Гарос, но беше одлучено да преноќи, да замине на уште еден преглед, а потоа да донесе одлука дали ќе оди под нож. Тие прегледи, заедно со лекарската препорака, заклучиле дека операцијата е најдоброто решение доколку сака да продолжи да игра тенис на највисоко ниво, но и максимално да го скрати закрепнувањето.

Затоа операцијата ќе биде направена денеска во Париз, како што јавува „Екип“, а Ѓоковиќ се надева дека закрепнувањето ќе оди според планот. Сепак, италијанскиот весник „Газете“ тврди дека операцијата била извршена утрово и дека Новак наскоро ќе ја напушти клиниката и ќе оди на закрепнување со патерици. Првичните прогнози се дека за три недели ќе може да се врати на тренинзите, дека веројатно ќе може да се натпреварува и на Олимписките игри во Париз, додека веќе е исклучен за Вимблдон.