Германското МНР ја обвини Кина дека таргетирала нејзин воен авион со ласер
Во меѓувреме, германското Министерство за надворешни работи го повика кинескиот амбасадор во Берлин, известувајќи дека кинеската војска употребила ласер за таргетирање на германски авион кој учествува во операцијата на ЕУ „Аспидес“, која помага во заштитата на бродовите во Црвеното Море.
„Загрозувањето на германскиот персонал и нарушувањето на операцијата се целосно неприфатливи“, соопшти министерството на X, објавувајќи го повикот.
Европските претставници постојано изразуваат загриженост за кинеското влијание врз критичната инфраструктура, вклучувајќи ги и клучните бродски правци.
ЕУ ja нарече операцијата „Аспидес“ според старогрчки збор што значи „штитови“, како одбранбена поморска безбедносна операција за заштита на навигацијата за време на кризата во Црвеното Море.
Откако започна војната на Израел во Газа против палестинската милитантна група Хамас во октомври 2023 година, милитантите Хути, поддржани од Иран, го напаѓаат Израел и бродовите во Црвеното Море, во она што тие го нарекуваат акти на солидарност со Палестинците.
Германската војска учествува во операцијата „Аспидес“ од февруари 2024 година. Нејзиниот парламентарен мандат одредува максимално распоредување од 700 воени лица.
Ројтерс објави дека германското Министерство за одбрана соопштило дека авионот, кој учествува во мисијата на ЕУ „АСПИДЕС“, која ги штити меѓународните морски патишта во Црвеното Море, придонесувал со платформа за повеќе сензори, или „летачко око“ за извидување на областа од октомври.
Кинески воен брод, кој бил сретнат неколку пати во областа, го таргетирал авионот со ласер без причина или претходна комуникација за време на рутински лет, изјави портпарол на министерството. Инцидентот се случил на почетокот на јули.
„Со користење на ласерот, воениот брод ја стави во опасност безбедноста на персоналот и материјалот“, рече портпаролот, додавајќи дека летот на мисијата бил прекинат како мерка на претпазливост и дека авионот безбедно слетал во база во Џибути.
Ројтерс забележа дека Кина претходно ги негираше обвинувањата за испукување или насочување ласери кон американски авиони. Инцидентите во кои е вклучена европска членка на НАТО и Кина се поневообичаени.