Французите не ги напуштаат Украинците: Макрон вети дека ќе обучи повеќе украински пилоти на француски авиони

Во телефонски разговор меѓу францускиот претседател Емануел Макрон и украинскиот претседател Володимир Зеленски, Франција вети дека ќе го зголеми бројот на украински пилоти кои ќе бидат обучени на авионите Мираж 2000.
Според украинските медиуми, украинските воздухопловни сили добиле најмалку пет повеќенаменски ловци Мираж 2000-5 како воена помош од Франција.

Обуката за пилоти и техничари на овој авион ја обезбеди Франција, а вчера беше потврдено дека бројот на пилоти ќе се зголеми, што укажува на можноста за нови донации од Париз.

„Би сакал особено да го истакнам нашиот договор за обука на пилоти за Мираж, Франција е подготвена да прифати дополнителни пилоти за обука на дополнителни авиони“, напиша Зеленски.

Покрај авионите, двајцата претседатели детално разговараа и за зајакнувањето на воздушната одбрана на Украина, вклучително и испораката на ракети за системите SAMP/T и финансирањето за беспилотни летала-пресретнувачи.

„Ќе подготвиме заеднички одлуки со Франција и партнерите на ниво на министри за одбрана и министри за надворешни работи во врска со нови чекори за заштита на животите на нашите луѓе од руски напади“, рече Зеленски.