Француски фоторепортер загина од руски дрон на фронтот во Украина, соопшти Макрон
Францускиот фоторепортер Антони Лаликан почина денеска во Украина како жртва на руски напад со дрон додека ја следеше украинската армија на фронтот, објави францускиот претседател Емануел Макрон.
– Нашиот сонародник ја следеше украинската армија на фронтот на отпорот. Со длабока тага дознав за неговата смрт, жртва на руски напад со дрон, напиша францускиот претседател на X.
Тој им оддаде почит на сите оние кои „го ризикуваат својот живот, ја информираат (јавноста) и сведочат за реалноста на војната“.
Макрон изрази сочувство до семејството на починатиот фоторепортер.