Еден од клучните луѓе на „Епл“: „За 10 години, iPhone можеби повеќе нема да постои“

Еди Кју, виш потпретседател за услуги на „Епл“, на неодамнешното судење против „Гугл“ спомена ера во која iPhone и другите паметни телефони еден ден може да станат излишни.

Тој наговести дека за десет години iPhone можеби повеќе нема да постои. Вашиот омилен iPhone (освен, се разбира, ако не сте повеќе склони кон Android телефони) би можел да стане минато. Зошто Еди Кју, виш потпретседател на одделот за услуги на Apple, даде толку изненадувачко тврдење?

Кју ги даде овие забелешки во средата за време на антимонополското судење на Google за Google Search, изнесувајќи ги своите размислувања за тоа како вештачката интелигенција (ВИ) еден ден би можела да го револуционизира технолошкиот сектор. „Можеби за десет години нема ни да ви треба iPhone, колку и да звучи лудо“, рече Кју, додавајќи:

„Единствениот начин да се има вистинска конкуренција е кога има технолошки напредок.“ Технолошкиот напредок создава вакви можности. Вештачката интелигенција е нова технолошка промена и отвора нови можности за нови играчи.

Кју посочи дека како што вештачката интелигенција станува понапредна, новите видови уреди или интерфејси како што се носливи уреди, слушалки со мешана реалност или амбиентални асистенти со вештачка интелигенција би можеле да ги заменат паметните телефони како наш главен начин за интеракција со технологијата.

Но, дали Apple навистина може да се откаже од iPhone? Само сетете се кога iPod-от првпат се појави во 2001 година и како сите мислеа дека е врвот на преносното слушање музика во тоа време – а потоа Apple постепено го повлече кога новата технологија доведе до iPhone.

„Епл“ продаде повеќе од 2,6 милијарди „Ајфони“ ширум светот од 2007 година, а вкупниот приход од нивниот најуспешен производ надминува неверојатни 1,5 трилиони долари. Имајќи го тоа предвид, тешко е да се замисли дека Apple едноставно би го објавил крајот на iPhone-от. Но, бидејќи е невозможно да се предвиди каква нова технологија нè очекува, можно е еден ден iPhone да биде заменет со нешто сосема друго, пишува Digital Trends.