Борис Џонсон (60) доби деветто дете

Поранешниот премиер на Обединетото Кралство, Борис Џонсон (60), тајно доби дете со сопругата Кери (37).

Кери ја сподели веста на Инстаграм за раѓањето на нејзината ќерка, која го доби името Попи Елиза Џозефин Џонсон. Девојчето е родено на 21 мај.

„Не можам да верувам колку си убава и ситна. Се чувствувам неверојатно среќна. Сите сме целосно заљубени. Не сум сигурна дали сум спиела ни минута откако си се родила, бидејќи не можам да престанам да гледам колку си прекрасна“, напиша таа.

Двојката веќе има три деца. „Вилф, Роми и Френк се исклучително воодушевени, особено Роми која очајно сакаше мала сестричка“, напиша сопругата на Џонсон во објавата. „Животот не може да биде подобар“, додаде таа.

Двојката се венча во мај 2021 година. Нивниот најстар син, Вилф, е роден во април 2020 година, Роми во декември 2021 година и Френк во јули 2023 година.

Нивната ќерка Попи, за која Кери рече дека била „последниот член на бандата“, е деветтото дете на Борис Џонсон. Тој има четири деца со поранешната сопруга Марина Вилер, а за време на аферата со уметничката консултантка Хелен Макинтајр, доби дете во 2009 година.