Бојмацалиев: Фер и слободни избори – гарантиран пат кон ЕУ


Новиот дополнителен заменик министер за внатрешни работи во техничката влада, Митко Бојмацалиев, ветува дека ќе преземе мерки за заштита на личните податоци и зајакнување на полициските капацитети.
 
– Во овој контекст, сакам да ги истакнам моите и напорите на мојот тим за заштита на личните податоци на граѓаните и за зајакнување на капацитетите на полицијата, со цел обезбедување на мирен тек на изборите. Со подготвеноста и професионалноста на вработените, нашата задача е да обезбедиме транспарентен, фер и слободен изборен процес, во кој секој граѓанин ќе може слободно да го изрази своето мислење и право на избор. Во оваа прилика, дозволете да бидам категоричен – очекувам работење исклучиво по закон од страна на вработените во МВР. Вие не должите никому ништо и очекувам да не подлегнувате на каков било притисок или уцена – вели Бојмацалиев во соопштението.
 
Тиој смета дека спроведувањето на европски избори е одраз на нашата зрелост како демократско општество. Тоа е доказ за нашата посветеност кон демократските вредности и нашиот напредок кон Европската Унија.
 
– Да организираме европски избори како што беа и претходните и со заеднички напори да продолжиме да градиме силна, стабилна и демократска Република Северна Македонија, со гарантиран пат кон Европската Унија – порачува Бојмацалиев.