Австрија воведува строги ковид мерки на работните места

Од 1 ноември, на секој што има физички контакт со други луѓе на своето работно место ќе му треба доказ дека е вакциниран, оздравен или има негативен тест за Ковид-19, објави министерот за здравство Волфганг Микштајн во средата на прес-конференција.

До 14 ноември ќе важи грејс-период, каде што секој што не ги исполнува овие критериуми ќе мора да носи маска FFP-2 на работа.

„Работодавачите, како и вработените, се одговорни за спроведување на мерките“, рече Мекштајн во средата.

Слични мерки веќе се донесени од некои приватни компании за да се осигури безбедноста на нивните вработени. Со новите мерки, владата настојува да создаде правна сигурност за приватниот сектор и да обезбеди луѓето да работат во безбедна средина.

„Неприфатливо е луѓето да бидат изложени на ризик да бидат заразени во нивната работна средина“, рече Микштајн.

За спроведување на новите мерки, работодавачите ќе треба да го проверат почитувањето на новите мерки кај нивните вработени по случаен избор. Прекршувањето на новите мерки ќе резултира со казни од 500 евра за вработените и до 3.600 евра за работодавачите.

За да се осигура дека компаниите и нивните вработени не се оптоварени со дополнителни трошоци, тестовите за корона вирус ќе продолжат да бидат бесплатни, а трошоците ќе бидат покриени од владата.

Австрија има пораст на стапката на инфекција во последните недели. Стапката на вакцинација стагнира со месеци и моментално изнесува околу 62 проценти.