Американските милијардери пандемијата ги направи побогати за 565 милијарди долари

Додека на многу луѓе во светот пандемијата на коронавирусот им донесе финансиски проблеми, милијардерите во САД станаа уште побогати.

Според извештајот на еден американски институт, вкупното богатство на милијардерите во САД од 18 март до сега е зголемено за 565 милијарди долари и сега изнесува 3,5 трилиони долари, а сопственикот на „Амазон“, Џеф Безос за нецели три месеци стана „потежок“ за 36,2 милијарди долари, јави Си-Ен-Ен.

Речиси 43 милиони Американци за време на пандемијата аплицирале за добивање парични средства за невработеност, а припадниците на пониско платените професии, особено во секторите патувања и услуги, се особено погодени од тековната криза.

Овие бројки го истакнуваат длабокиот јаз меѓу богатите и сиромашните, за кои Си-Ен-Ен вели дека ги поттикнуваат немирите низ САД, а експертите велат дека нееднаквоста во распределбата на богатството ќе стане уште поизразена како резултат на кризата.