Америка даде рок од неколку дена за прекин на огнот во Украина – прва реакција на Русија

Постојаниот претставник на Русија во Обединетите нации, Василиј Небензја, изјави дека прекинот на огнот во Украина во моментов е нереален, пренесува украинскиот јавен сервис Суспилна, повикувајќи се на брифинг одржан во Њујорк.

Небензја тврди дека обидите за ограничен прекин на огнот, кој треба да важи само за енергетската инфраструктура на двете земји, пропаднале бидејќи, како што вели, Украина ги прекршила.

„Имавме обид за ограничено примирје поврзано со енергетските капацитети, но украинската страна не го почитуваше. Во сегашните околности, да се зборува за примирје е едноставно нереално“, рече Небензја.

Трамп очекува руски одговор на предлогот за прекин на огнот
Изјавата доаѓа веднаш откако американскиот претседател Доналд Трамп рече дека Русија треба да даде одговор на американскиот предлог за прекин на огнот во Украина оваа недела.

Американскиот шеф на дипломатијата Марко Рубио денеска изјави дека доколку не е можно да се стави крај на војната во Украина, Соединетите Американски Држави треба да се откажат од напорите и да продолжат понатаму.

Украинскиот претседател Володимир Зеленски претходно изјави дека очекува Вашингтон да ги заостри санкциите кон Русија поради нејзиното одбивање да се согласи на прекин на огнот. Во меѓувреме, високи претставници на администрацијата на Трамп признаваат дека е сè поверојатно дека САД нема да постигнат мировен договор во наредните месеци.