ФБИ и Скотланд јард ќе го истражуваат убиството на словачкиот новинар
Американското ФБИ и британски Скотланд јард како и други странски агенции помагаат на словачките колеги во истрагата за убиството на новинарот Јан Куциак и неговата вереница, изјави денеска словачкиот минстер за внатрешни работи Роберт Калинак.
Во порака на фејсбук, Калинак вели дека е во контакт со „најважните истражни агенции во светот“ кои ги замолил за помош во истрагата.
Тој претходно изјави дека чешките и италијански полициски сили како и Европол веќе соработуваат со своите словачки колеги во истрагата.
Словачката полиција приведе седум луѓе и изврши претрес на неколку локации во врска со италијански бизнисмени за кои се сомневаат дека имаат врски со италијанската мафија, за што Куциак пишувал во последниот текст, кој беше постхумно објавен.