Општина Карпош стопираше изградба на два објектa на партијата на Љубисав Иванов – Ѕинго

Општина Карпош денеска донесе решение за прекин на постапката за изградба на два објекта на местото на стариот Дом за култура во населбата Тафталиџе 1. Станува збор за објект кој е во сопственост на Социјалистичка партија на Македонија на Љубисав Иванов Ѕинго,  а во чие име инвеститорот „Гренадер“ ДООЕЛ – Скопје на негово место предвидува изградба на два објекта.

Решението е донесено врз основа на член 95 од Законот за општа управна постапка како претходно прашање, бидејќи за таа градежна локација надлежното јавно обвинителство води предистражна постапка.

Откако пред неколку месеци ги платиле комуналиите, на СПМ и „Гренадер“ им било возвратено од Општината со писмо во кое ја барале трансакциската сметка за им бидат вратени парите, но пред само два дена, инвеститорите одговориле дека не сакаат да им се вратат средствата туку сакале да градат.

Денеска, градоначлникот на Карпош, Стефан Богоев им го испратил решението за прекин на постапката, со образложение дека надлежното јавно обвинителство побарало списи од општината поради истрагата.

-Решението за прекин на постапката е поради истрагата. Додека не се донесе одлука, ние побаравме да им ги вратиме парите бидејќи не сакаме штета ниту кај нив ниту кај општината, изјави Богоев.

Фото: A1 on