Од рак на дојка годишно умираат 279 жени, неопходни редовни прегледи

Ова беше истакнато на прес-конференцијата на Институтот за јавно здравје на Република Македонија по повод „Октомври – Месец за свесноста за рак на дојка”.

Раководителот на Секторот за промоција, анализи и следење на незаразни болести при Институтот за јавно здравје, проф. д-р Елена Ќосевска рече дека изготвен е план на активности според кои подготвиле плакати, брошури и упатство за самопреглед на дојките кои преку десетте центри за јавно здравје се дистрибуираат до речиси сите здравствени установи.

– Сите жени на возраст од 50 д 69 години кои немаат симптоми имаат можност да направат бесплатен мамографски преглед заради евентуално откривање на ракот на дојка во неговиот претклинички стадиум. Предност имаат жените кои ќе бидат повикани, а немаат регулирано осигурување. Доколку не успеат да добијат термин оваа година, програмата продолжува и следната година, што значи можностите се обезбедени, посочи Ќосевска.

Појасни дека мамографски прегледи се прават во 22 јавни здравствени установи, во Здравствената станица Железара, девет здравствени домови, осум општи болници, три клинички болници и во Универзитетската клиника за радиологија каде има дигитални и аналогни мамографски апарати.

Раководителот на Центарот за статистичка обработка на податоци, публицистика и едукација при Институтот за јавно здравје, Вјоса Речица рече дека една на секои осум жени може да развие рак на дојка. Началникот на Одделението за следење на незаразни болести при Институтот, Тања Лековска-Стоицовска истакна дека самопрегледот на дојките треба да биде детален и редовен.

Одговарајќи на новинарско прашање Ќосевска рече дека кога почнала програмата во вид на кампања кај многу поголем број жени ракот на дојка бил дијагностицирана во напреднат стадиум, а за разлика од тогаш сега поголем е бројот жени кај кои болеста се дијагностицира во прв или втор стадиум.

– Со новата програма за рано откривање на ракот на дојка предвидено е податоците кои ќе ги собере Управата за електронско здравство во јануари идната година да ги достави до Институтот за јавно здравје, ние ќе направиме нивна обработка и ќе излеземе со извештај за 2018 година, додаде Ќосевска.