Невладиниот сектор ќе помага за зголемување на посетеноста на Зоолошката во Битола

Менаџерскиот тим и управниот одбор на општинска јавна установа Зоолошка Градина-Битола утврдија програма за зголемување на посетеноста во ЗОО-градината во 2019 година.

Според програмата која е одобрена од Советот на општина Битола, со зголемување на соработката со невладините организации од градот и државата, ќе се зголеми и посетеноста во оваа ЗОО-Градина.

-Битолската Зоолошка Градина е сместена во прекрасна природа на падините на Тумбе Кафе со оригинален и нетипичен „ридско-планински“ изглед. Во „ЗОО-Битола“ има матично стадо со повеќе од 30 видови животни и над 400 претставници на животинскиот свет кој треба да биде погледнат од домашната и меѓународната публика. Затоа во 2019 година ќе ја зголемиме соработката со НВО-секторот и веруваме дека на тој начин ќе се зголеми посетеноста во „ЗОО-Битола“, информираат од таа јавна установа, чиј основач е општина Битола.

Во текот на следната година во „ЗОО-Битола“ ќе биде извршена посебна реконструкција и санација на оградата каде се сместени тревопасните животни, реконструирање на складот за сено, како и хортикултурно уредување на површините.

Менаџерскиот тим планира како во оваа, така и наредната година да работи со ист буџет од девет милиони денари, а се очекуваат и дополнителни приходи од околу 2,5 милиони денари од продадени влезници и други активности.

Битолската Зоолошка Градина е основана на 1 мај 1950 година како заедничка идеја и со поддршка на ЗОО-Градини во Скопје, Суботица, Загреб и Белград.