Видео приказните на Седат Пекер ја растресоа турската влада

Мафијашот кој порано соработуваше со тајните служби во своите емисии на Јутјуб обвинува високи владини функционери за злосторства вклучувајќу убиство, силување, корупција и трговија со дрога

Турските телевизиски серии се популарни во целиот муслимански свет за време на Рамазан, полни со приказни за интригите во палатата и криминалното подземје.

Оваа година изненадувачкиот хит не е измислен.

Озлогласениот шеф на мафијата во реалниот живот, Седат Пекер, ја електрифицираше Турција со серија видеа на Јутјуб во последните три недели, во кои тој изрази низа обвинувања – вклучувајќи убиства, силувања, раширена корупција и трговија со дрога – на познати личности од турската влада.

Вртоглавите тврдења се протегаат со децении наназад и се неиздржани. Но, тајмингот на едночасовните монолози на Пекер, во кој тој се претставува како свиркач, е поразителен за турскиот претседател Реџеп Таип Ердоган, чија партија веќе се бори на анкетите во услови на економска мизерија и критики за справување со пандемијата.

На досегапните седум епизоди на Пекер, од вкупно ветените 12, им требаше време да се регистрираат во традиционалните медиуми во Турција, кои од обидот за воен удар во 2016 година се строго контролирани од државата. Сепак, на разни онлајн платформи, видеата собраа повеќе од 30 милиони прегледи. Видео серијата, насловена „Седат Пекер наспроти АКП“ (владејачката партија на Ердоган за правда и развој), за кратко време стана најдобро рангирана светска телевизиска емисија на интернет базата на филмови, сè додека не беше отстранета во понеделникот.

Пекер (49) стана озлогласен во 90-тите години на минатиот век, во врвот на политичката-мафијашка врска во Турција, кога беше откриено дека разузнавачките агенции соработувале со гангстери за да извршат политички убиства. Издржа неколку затворски казни.

По неговото ослободување во 2014 година, мафијашот имаше комплицирани врски со круговите на АКП, па ја напушти земјата во 2020 година, откако Министерството за внатрешни работи отвори нова истрага за неговите мрежи, а тој рече дека во моментов е во Дубаи. Во неговиот дом во Истанбул беше извршена рација од властите во април.

Седејќи на маса во хотелска соба, со златен синџир и медалјон околу вратот и книги и белешки уредно наместени пред него, Пекер се врти од тема на тема и личност до личност, нудејќи драматични извештаи за злосторствата извршени во име на избрани функционери, и користење на правна терминологија и внимателно обележување со патокази што укажуваат дека неговите наводи се стокмени да градат случаи на суд.

Во емитувањето на валкани испрани алишта на АКП во последниве две децении, Пекер исто така ги повика младите во земјата да го оспорат политичкото статус кво.

„Мои скапоцени браќа, мои браќа под 40-годишна возраст… Треба да направите нов свет, нова земја во оваа земја: на оваа земја ѝ е потребно 84-те милиони [население] да бидат како еден“, рече тој.

„Пред нас се денови што ќе бидат вознемирувачки. Тие ќе нѐ натераат да се бориме… Ние мора да се обединиме “.

Малку по малку, гангстерот создаде слика на обемна соработка помеѓу мрежите на организиран криминал и врвни функционери. Неговата главна цел досега е моќниот министер за внатрешни работи Сулејман Сојлу, за кого Пекер вели дека е заштитен од ривалските фракции во рамките на АКП. Тој исто така го обвини синот на поранешниот премиер Бинали Јилдирим за шверц на кокаин од Венецуела како дел од мрежата на трговија со луѓе што се протега низ казино-економијата на северен Кипар и пристаништето контролирано од сирискиот режим. Поранешниот премиер рече дека неговиот син отишол во Венецуела да донесе маски и лична заштитна опрема за Турција.

Според Пекер, еден поранешен министер за внатрешни работи, осуден на пет години затвор за соработка со гангстерски фигури во 90-тите години, бил директно вклучен во нерешеното убиство на новинар во 1993 година, а неговиот син, исто така политичар, силувал и убил новинар во 2019 година. Поранешниот министер за внатрешни работи на Твитер рече дека тврдењата на Пекер се „клевета“.

Тој исто така рече дека поранешен потполковник и висок функционер на турската разузнавачка служба (МИТ) наредил убиство на новинар на кипарските Турци во 1996 година.

Пекер дури се имплицираше и себеси во злосторства, велејќи дека неговите луѓе ги нападнале канцелариите на еден весник во 2015 година и им се заканувале на професорите кои повикуваат на мир во долготрајниот конфликт на Турција со Работничката партија на Курдистан (ПКК) по наредба на официјални лица на АКП и помогнале во запленувањето на имотот и имотите кои им припаѓаат на непријателите на владејачката партија.

Неколкумина од луѓето со кои прстот впери криминалниот шеф беа важни фигури во турско-американските односи за време на администрацијата на Трамп, според д-р Ајше Заракол, предавач по меѓународни односи на Универзитетот во Кембриџ.

Нашироко се очекува дека преостанатите епизоди ќе се осврнат на борбите преку границата кон Сирија и гласините за бројки со кои се купувала нафта од Исламска држава пред неколку години.

Додека Пекер не го допрел „Брат Таип“, како што го нарекува претседателот, нападите на потесниот круг на Ердоган јасно ставаат до знаење дека тој е крајната цел. Видеата привлекоа индиректно укор од самиот Ердоган, кој минатата недела рече дека неговата партија стекнала кредибилитет и донесла мир во Турција, справувајќи се со криминалните банди кога дојде на власт пред 19 години.

Но, наводите на мафијата имаа такво влијание токму затоа што ги зајакнуваат сомневањата на Турците дека односот помеѓу естаблишментот и организираниот криминал не само што трае, туку и цвета во последните неколку години. Политичките сојузи на Турција беа трансформирани по обидот за воен удар во 2016 година: крајно десничарската партија Националистичко движење (МХП), со која Ердоган е во коалиција, има добро документирани врски со криминални фигури.

Противниците на АКП можат да почувствуваат мирис на крв во вода и има сè поголеми повици за истраги и оставки. „Легитимноста или положбата на Пекер не оправдуваат тишина или неказнивост“, изјави за АФП Ерол Андероглу, претставник на Турција за „Репортери без граници“.

Сите лица ги негираа наводите на Пекер и Сојлу започна постапка за клевета против него. Но, во тричасовно интервју емитувано на владиниот канал Хабертурк во понеделникот вечерта, Сојлу мораше да се брани од тврдењата на гангстерот. Провладините медиуми молчеа околу ова прашање во вторникот наутро, покренувајќи шпекулации дека неговата политичка кариера е во сериозни проблеми.

Досега е извршено едно апсење: на братот на самиот Пекер, Атила, откако Седат рече дека тој бил дел од неуспешната мисија во 1996 година за убиство на новинар. Но, сега, кога мафијашот го разнесе она што претходно беше култура на тишина, може да има повеќе апсења во наредниот период.

„Денешната слика е уште полоша [од 90-тите]. Во тоа време, барем постоеше функционална структура. Ние ја извршувавме нашата должност, го сторивме тоа сериозно. Добивавме поддршка“, изјави Мехмет Ејмур, поранешен шеф на антитероризам за МИТ, за весникот „Џумхуриет “.

„Во 90-тите години немаше толку многу прикриена активност. Не беше на ова ниво… Крајот на ова ќе бидат политички убиства“.

Следното видео на Пекер треба да биде објавено во недела. (Гардијан)