Трамп побарал европските лидери да извршат притисок врз Кина и да не купуваат руска нафта

Американскиот претседател Доналд Трамп, во денешниот телефонски разговор со лидерите на земјите од Коалицијата на подготвените, побарал од европските држави да извршат економски притисок врз Кина поради нејзината поддршка за Москва и да не купуваат руска нафта, бидејќи тоа помага во финансирањето на војната во Украина, изјави неименуван американски претставник.

Претходно, украинскиот претседател Володимир коментирајќи го телефонскиот разговор на лидерите на Коалицијата со Доналд Трамп, наведе дека американскиот претседател „е многу незадоволен“ поради тоа што земји-членки на ЕУ купуваат руска нафта, при тоа посочувајќи ги Словачка и Унгарија.

– Претседателот Трамп и американската администрација се вознемирени… поради изборот што го направија две земји-членки на ЕУ, кои продолжуваат да купуваат руска нафта.

Зеленски по денешната средба на Коалицијата на подготвените, што се одржа во Елисејската палата наведе дека сите учесници се согласиле дека Русија ги отфрла сите иницијативи за мир и оти постигнале разбирање за општата рамка на безбедносните гаранции за Киев.

Според него силна украинска армија е основа на сите гаранции и затоа ги повика европските компании за оружје да работат со полн капацитет.

Зеленски, на заедничката прес-конференција со францускиот претседател Емануел Макрон, посочи дека секоја земја од Коалицијата на подготвените во моментов подготвува документи за својот придонес кон безбедносните гаранции. Тој додаде дека е постигнато разбирање за тоа кои земји се подготвени да испратат воен персонал во Украина и инсистира дека САД треба да бидат дел од безбедносните гаранции.

Макрон истакна дека 26 земји се обврзале да учествуваат во обезбедување гаранции за Украина по копно, воздух или море, додека поддршката на САД за безбедносните гаранции ќе биде финализирана во наредните денови.

– Имавме телефонски разговор со претседателот Трамп … Заклучоците од овој разговор се едноставни: Во наредните денови ќе ја финализираме американската поддршка и овие безбедносни гаранции. САД, како што реков, беа вклучени во секој чекор од процесот, истакна Макрон

Тој додаде дека Украина сега ќе ги координира санкциите против Русија со САД.

– Доколку Русија продолжи да одбива да учествува во мировните преговори, ќе има нови санкции во координација со САД, истакна Макрон.