Трамп и Карни ќе разговараат наредните денови за царините

Американскиот претседател Доналд Трамп и канадскиот премиер Марк Карни веројатно ќе разговараат наредните денови откако САД воведоа царини од 35 проценти на стоки кои не се опфатени со трговскиот договор меѓу Америка, Мексико и Канада.

Ова за Си-Би-Ес Њуз го изјави министерот за американско-канадска трговија во федералната влада, Доминик ЛеБланк, и додаде дека е „охрабрен“ од неодамнешните разговори, како и дека верува оти договор за намалување на царините останува опција.

– Ние сме охрабрени од разговорите со американскиот министер за трговија, Хауард Лутник, и со претставникот на САД за трговски прашања, Џејмисон Грир, но сè уште не сме дојдени до точката неопходна за да се постигне договор што е во најдобар интерес на економиите на двете земји, рече ЛеБланк.