Трамп е подготвен за „втората фаза“ од санкциите против Русија

Американскиот претседател Доналд Трамп изјави на 7 септември дека е подготвен да премине во втора фаза од санкционирањето на Русија, што е најблиску што некогаш дошол до тоа да сугерира дека е на работ на засилување на санкциите против Москва или нејзините купувачи на нафта поради војната во Украина.

Трамп постојано ѝ се закануваше на Москва со дополнителни санкции, но ги воздржа додека ги водеше мировните преговори.

Најновите коментари укажуваат на сè поагресивен став, но Трамп не кажа дека е посветен на таква одлука или што би можела да вклучува втората фаза.

На прашањето на новинар во Белата куќа дали е подготвен да премине во „втората фаза“ од санкциите против Русија, Трамп одговори: „Да, сум“.

Тој не даде дополнителни детали.

Трамп е фрустриран од неговата неспособност да ги запре борбите откако првично предвиде дека ќе може брзо да ја заврши војната во Украина кога ќе ја преземе функцијата во јануари.

Изјавата беше продолжение на коментарите на Трамп од 3 септември, бранејќи ги мерките што веќе ги презеде кон Русија, вклучително и воведување на „казнени тарифи за извозот на Индија кон САД“ во август.

Индија е главен купувач на рускиот извоз на енергија, додека западните купувачи го намалија обемот како одговор на војната.

„Тоа ја чинеше Русија стотици милијарди долари“, рече Трамп на 3 септември. „Вие го нарекувате тоа никаква акција? И јас сè уште не сум ја завршил втората или третата фаза“.

Министерот за финансии Скот Бесент изјави на 7 септември дека САД и Европската унија би можеле да воведат нови „секундарни тарифи за земјите што купуваат руска нафта,

туркајќи ја руската економија на работ на колапс“ и доведувајќи го рускиот претседател Владимир Путин на преговарачката маса.

Кина е главен купувач на рускиот извоз на енергија.

Специјалниот пратеник на Трамп за Украина, Кит Келог, оцени дека рускиот напад врз владината зграда во Киев не е сигнал оти Москва има намера дипломатски да ја заврши војната. „Нападот не беше сигнал дека Русија сака дипломатски да ја заврши оваа војна“, рече Келог преку социјалната мрежа Икс.

Келог нагласи дека опасноста од каква било војна лежи во ескалацијата, а Русија, според него, „се чини дека ескалира“ со лансирањето на најголемиот воздушен напад во војната, во кој за прв пат беше погодена и украинската владина зграда.

Специјалниот пратеник откри и дека само пред две недели престојувал во истата зграда, каде што се сретнал со украинската премиерка Јулија Свириденко.

Тој предупреди дека ваквите потези би можеле да излезат од контрола. „Историјата покажува дека настаните можат да ескалираат надвор од контрола преку вакви акции. Затоа претседателот Трамп работи на запирање на оваа војна“, заклучи Келог. (Ројтерс)