„Танцот на змејот и слонот“: Кина и Индија се партнери, а не соперници

Кинескиот претседател Си Џинпинг денеска, за време на средбата со индискиот премиер Нарендра Моди, изјави дека Кина и Индија се партнери во соработката, а не соперници, и дека двете земји една за друга се развојни прилики, а не закани.

Како што објави кинеското Министерство за надворешни работи, Си по средбата со Моди во кинескиот пристанишен град Тјенџин изјави дека „танцот на змејот и слонот“, односно постигнувањето добрососедски пријателски и партнерски односи меѓу двете најнаселени земји во светот, треба да биде вистинскиот избор и за Кина и за Индија.

Кинескиот лидер истакна дека минатогодишниот успешен состанок на самитот на БРИКС во Казан го означи повторното лансирање на односите меѓу Кина и Индија, при што размената и соработката меѓу двете земји постојано напредуваат.

Тој рече дека Кина и Индија, како две древни источни цивилизации и двете најнаселени земји во светот, се важни членови на Глобалниот Југ и дека тие ја носат одговорноста за благосостојбата на своите народи, промовирањето на единството и ревитализацијата на односите меѓу земјите во развој и унапредувањето на напредокот на човечкото општество.

Си нагласи дека оваа година се одбележува 75-годишнината од воспоставувањето дипломатски односи меѓу Кина и Индија и дека двете страни треба да ги набљудуваат и управуваат односите на двете земји од стратешка и долгорочна перспектива, дополнително да ги подобруваат преку самитот во Тјенџин и да го промовираат одржливиот, здрав и стабилен развој на билатералните односи.

Кинескиот претседател ги повика двете земји да ја зајакнат стратешката комуникација и да ја продлабочат меѓусебната доверба, со оценка дека сè додека останат посветени на сеопфатниот принцип да бидат партнери, а не соперници, и да си обезбедат едни на други можности за развој, а не закани, односите меѓу Кина и Индија ќе цветаат и ќе бележат постојан напредок.

Тој, исто така, рече дека Индија и Кина треба да ја прошират размената и соработката со цел да постигнат меѓусебна корист и меѓусебно корисни резултати.

Си оцени дека и Кина и Индија се во критична фаза на развој и ревитализација и треба да се фокусираат на развојот како нивен најголем заеднички именител, поддржувајќи, промовирајќи и постигнувајќи заеднички успех.

Тој додаде дека двете земји треба да ги почитуваат меѓусебните грижи и да ја поддржат хармоничната коегзистенција, како и да работат заедно за одржување на мирот и спокојството во пограничните области и да не дозволат граничното прашање да ги дефинира целокупните односи меѓу Кина и Индија.

Кинескиот претседател, исто така, како цел го наведе зајакнувањето на мултилатералната соработка, со цел да се заштитат заедничките интереси.

Си рече дека Кина и Индија мора заеднички да покажат историска одговорност, да го поддржат мултилатерализмот, да ја зајакнат комуникацијата и соработката по важни меѓународни и регионални прашања, да ја бранат меѓународната праведност и правда, да работат заедно за промовирање на мултиполарен свет и демократизирање на меѓународните односи и да го дадат својот должен придонес за одржување на мирот и просперитетот во Азија и во светот.

 „Ние сме посветени на унапредување на нашите односи врз основа на меѓусебно почитување, доверба и разбирање“, му рече Моди на Си за време на состанокот, може да се види од видео материјалот објавен на официјалниот профил на индискиот лидер на X.

До билатералната средба доаѓа пет дена откако Вашингтон воведе казнени тарифи од 50 проценти на индиската стока поради купувањата на руска нафта од Индија. 

Аналитичарите велат дека Си и Моди сакаат да претстават обединет фронт против западниот притисок.

Моди рече дека е создадена атмосфера на „мир и стабилност“ на нивната спорна хималајска граница, местото на долготраен воен застој по смртоносните судири на војниците во 2020 година што ги замрзна повеќето области на соработка меѓу стратешките ривали со нуклеарно оружје.

Тој додаде дека е постигнат договор меѓу двете земји во врска со управувањето со границите, без да даде детали.

Двајцата лидери имаа значајна средба во Русија минатата година откако постигнаа договор за гранични патроли, предизвикувајќи привремено затоплување на врските што се забрза во последните недели, бидејќи Њу Делхи се обидува да се заштити од обновените закани со царини од Вашингтон.

Директните летови меѓу двете земји, кои беа суспендирани во 2020 година, „продолжуваат“, додаде Моди, без да прецизира временска рамка.

Кина овој месец се согласи да ги укине ограничувањата за извоз на ретки минерали, ѓубрива и машини за дупчење тунели за време на клучната посета на кинескиот министер за надворешни работи Ванг Ји на Индија.

Кина се спротивставува на високите царини на САД за Индија и „ќе застане цврсто на страната на Индија“, изјави овој месец амбасадорот на Кина во Индија, Сју Феихонг.

Со децении, Вашингтон макотрпно ги негуваше врските со Њу Делхи со надеж дека тоа ќе дејствува како регионална противтежа на Пекинг.

Во последните месеци, Кина им дозволи на индиските аџии да ги посетуваат будистичките места во Тибет, а двете земји ги укинаа реципрочните ограничувања за туристичките визи.