Северна Кореја го откажа учеството на Олимпијадата во Токио поради корона вирусот

Севернокорејското министерство за спорт во вторникот соопшти дека нема да учествува на Олимписките игри во Токио оваа година за да ги заштити своите спортисти во услови на пандемија на коронавирус.

Одлуката била донесена на состанокот на Олимпискиот комитет на Северна Кореја на 25 март, соопшти Министерството на својата веб-страница. „Комитетот одлучи да не се приклучи на 32. Олимпијада за да ги заштити спортистите од светската здравствена криза предизвикана од корона вирусот“, се вели во соопштението.

Северна Кореја има еден од најстрогите режими на карантин во светот, и покрај негирањето на владата дека биле откриени какви било случаи во земјата.

Мерките ѝ дозволија на владата да ја зголеми контролата над секојдневниот живот на нивоа слично на гладните години во 90-тите, според аналитичарите.

Надворешните лица се сомневаат дали земјата целосно ја избегнала пандемијата, со оглед на лошата здравствена инфраструктура и порозната граница што ја дели со Кина, нејзиниот економски спас.

Опишувајќи ги своите антивирусни напори како „прашање на национално постоење“, Северна Кореја има строго ограничен прекуграничен сообраќај, забранува туристи, протера дипломати и става во карантин десетици илјади луѓе кои покажаа симптоми.

Премиерот на Јапонија, Јошихиде Суга, претходно изјави дека очекува да го покани американскиот претседател Џо Бајден на Олимписките игри и дека е подготвен да се сретне со севернокорејскиот лидер Ким Џонг-ун или неговата моќна сестра Ким Џо-јонг, доколку некој присуствува на Игрите. Суга, сепак, не рече дали ќе покани некој од нив.

Министерството за обединување на Јужна Кореја во вторникот изрази жалење за одлуката на Северот, велејќи дека се надева оти Олимписките игри во Токио ќе дадат можност за подобрување на меѓукорејските односи.

Северна Кореја испрати 22 спортисти на Зимските олимписки игри 2018 во Јужна Кореја, заедно со владини претставници, уметници за перформанс, новинари и навивачка група од 230 члена.

Олимписките игри се огромно непопуларни во Јапонија, до 80% од Јапонците сакаат Игрите да бидат откажани или повторно одложени. Игрите првично требаше да се одржат во 2020 година, но беа одложени поради пандемијата. Оваа година, владата најави дека ќе забрани прекуокеански гледачи.

На нешто повеќе од 100 дена до почетокот, јапонските здравствени власти се загрижени дека варијантите на корона вирусот ќе го предизикаат четвртиот бран.

Во понеделникот имаше 249 нови инфекции во Токио, сè уште далеку под врвот од над 2.500 во јануари. Во Осака, бројката беше 341, што е помалку од рекордните 666 случаи во саботата. Јапонија потврди вкупно 490. 000 инфекции од почетокот на пандемијата. Бројот на починати изнесува 9.227. (Според агенциите)