Секој шести Бугарин има роднини во Македонија
Речиси 61 отсто од бугарските граѓани сметаат дека Македонија треба да стане членка на Европската Унија, покажуваат резултатите од анкетата што вечерва ја објави Бугарската национална телевизија (БНТ).
Ова е одговор на прашањето – каков е принципиелниот интерес на Бугарија за членството на РСМ во ЕУ, ако се остават настрана спорните прашања. 60,9 отсто од Бугарите одговориле дека земјава треба да стане членка на Унијата, а 32,2 отсто од испитаниците рекле дека Северна Македонија не треба да стане членка на ЕУ.
Интересни се и споредбите на ставовите на граѓаните на прашањето – дали треба да се каже „да“ за почеток на преговорите и без да се постигне договор на отворените прашања помеѓу Бугарија и Северна Македонија. Притоа, 29,6 отсто од испитаниците одговориле „да“ што во оваа анкета е пораст за околу 13 отсто во споредба со одговорите дадени во истражувањето во ноември 2020 г. кога позитивно одговориле 16,9 отсто. Дека не треба да се дозволи почеток на преговорите сметаат 69 отсто од Бугарите. Во ноември 2020 г. со ваков став биле 81,1 отсто.
Анкетата на „Алфа рисрч“ открива и дека 61,9 отсто од испитаниците сметаат оти новите влади на Бугарија и на Северна Македонија треба да ги задржат сегашните позиции, но и да ги надградат за да се деблокираат преговорите на земјава со ЕУ. Други 12,4 отсто, пак, сметаат дека треба да се остане на актуелните позиции, додека 25,7 отсто се на став оти треба да се изградат целосно нови позиции.
На прашањето, пак, кои теми треба да влезат во преговорите со РСМ пред Бугарија да донесе одлука за тргање на ветото – 80,1 отсто од Бугарите одговорите „историјата“. „Образование и култура“ одговориле 76,1 отсто, економија и транспортни поврзувања 65,5 отсто, а инфраструктура 63,3 отсто.
Интересен момент од истражувањето кој го истакнува БНТ е и дека секој шести Бугарин има роднински врси со РСМ. На прашањето дали меѓу роднините, вклучително и далечните, имате луѓе со корени од географската област Македонија, со „да“ одговориле 17,3 отсто. 81,9 отсто рекле „не“, додека 0,8 отсто не знаеле.
