Се вратија акцизите и ДДВ, бензините поскапуваат за 1,5 и 2 денари за литар, дизелот на 0,50 денари

Од вечерва на полноќ, малопродажните цени на нафтените деривати ќе се зголемат од 0,50 до 2 денари за литар, во зависност од видот на горивото, соопшти Регулаторната комисија за енергетика. РКЕ во оваа пресметка ги вкалкулира референтните износи на акцизите за ЕУРОСУПЕР БС-95, ЕУРОСУПЕР БС-98 и ЕУРОДИЗЕЛ (Д-Е V), со оглед на истекот на Одлуката за изменување на Одлуката за определување на видот на енергентите, временскиот период и начинот на пресметка на акцизата.

Така, од полноќ, малопродажната цена на бензинот ЕУРОСУПЕР БС-95 се зголемува за 1,50 ден/литар, малопродажната цена на бензинот ЕУРОСУПЕР БС-98 се зголемува за 2,00 ден/литар, а малопродажната цена на ЕУРОДИЗЕЛ (Д-Е V) се зголемува за 0,50 ден/литар.

Малопродажната цена на Екстра лесното масло за домаќинство на (ЕЛ-1) се намалува за 2,50 ден/лит.

Малопродажната цена на Мазутот М-1 НС се намалува за 1,074 ден/кг и сега ќе изнесува 46,223 ден/кг.

Од 16.6.2026 година од 00:01 часот максималните цени на  нафтените деривати ќе изнесуваат:

Моторен бензин               ЕУРОСУПЕР БС – 95                             87,50  (денари/литар)

Моторен бензин               ЕУРОСУПЕР БС – 98                             90,00  (денари/литар)

Дизел гориво                ЕУРОДИЗЕЛ БС (Д-Е V)                         87,50  (денари/литар)

Масло за горење             Екстра лесно 1 (ЕЛ-1)                         86,50  (денари/литар)

Мазут М-1 НС                                                                                          46,223 (денари/килограм)

Воо соопштението на РКЕ се вели дека се врши намалување на малопродажните цени на нафтените деривати во просек за 0,10% во однос на одлуката од 8.6.2026 година.

Референтните цени на нафтените деривати на светскиот пазар во споредба со претходната пресметка бележат намалување и тоа во просек: кај бензините за 2,178%, кај дизелот за 4,441%, кај екстра лесното масло за 5,099%  и кај мазутот намалувањето е за 3,635%.

Курсот на денарот во однос на доларот во изминатиот период по кој беа формирани цените со претходната пресметка е повисок за 0,5395%.

РКЕ во оваа пресметка ги вкалкулира референтните износи на акцизите за ЕУРОСУПЕР БС-95, ЕУРОСУПЕР БС-98 и ЕУРОДИЗЕЛ (Д-Е V), со оглед на истекот на Одлуката за изменување на Одлуката за определување на видот на енергентите, временскиот период и начинот на пресметка на акцизата.

„Напоменуваме дека ова се максималните цени на нафтените деривати од 00:01 часот на 16.6.2026 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, се вели во соопштението на РКЕ.