Самитот на Г20 заврши – Индија, Русија и Бразил го оценија како успешен
Индискиот премиер Нарендра Моди го затвори самитот на Г-20 во недела на 10 септември, кој ги смируваше страстите и длабоките поделби околу војната во Украина и климатските промени, но, му ги даде своите „пет минути“ на глобалната дипломатска сцена.
Лидерите на Г-20 се жестоко поделени од почетокот на руската инвазија на Украина минатата година, а рускиот претседател Владимир Путин одлучи да не се појави на самитот.
Лидерите на групата најразвиени земји Г20, во која спаѓаат Русија и Кина, како и некои од најсилните сојузници на Украина, долго време не можеа да се договорат за ништо, особено за инвазијата која трае веќе 18 месеци.
Соочувајќи се со дипломатски срам на светската сцена, домаќинот на самитот, Индија, ги притисна членките на Г20 да дадат заедничка изјава во саботата со која се осудува употребата на сила за да се добие територија, но, директно не ја критикуваа Русија.
Киев соопшти дека Г20 „нема со што да се гордее“, но рускиот министер за надворешни работи, Сергеј Лавров, кој беше замената на Путин на самитот, прогласи дипломатска победа во неделата.
„Успеавме да ги спречиме обидите на Западот да ја „украинизира“ агендата на самитот“, рече искусниот дипломат, оценувајќи го дводневниот собир на светските лидери како „успешен“.
Во неделата, Моди формално го затвори самитот, предавајќи му го церемонијалниот подарок на бразилскиот претседател Луис Инасио Лула да Силва, чија земја ќе го преземе претседавањето со блокот Г20 во декември.
„Не можеме да дозволиме геополитичките прашања целосно да доминираат во дискусиите на агендата на групата Г20“, рече Лула, имплицитно мислејќи на војната во Украина.
Индискиот државен службеник Амитаб Кант на социјалната мрежа „Х“ (поранешен Твитер) напиша дека компромисниот текст за Украина е резултат на „повеќе од 200 часа континуирани преговори, 300 билатерални состаноци и 15 нацрти“.
САД, Индија и Г20 најавија проект кој ќе ги поврзе Индија, Блискиот Исток и Европа
Моди, кој го нарече самитот како дипломатско созревање за Индија и кој бара постојано место во Советот за безбедност на ОН за земјата, го поздрави ново членство на Африканска унија во Г20.
Г20 вклучува 19 земји и Европската унија, која претставува 85 отсто од светскиот БДП, а Јужна Африка е единствената членка од тој континент.