Русите сакаат жените да почнат да раѓаат порано. Решението го гледаат во скратување на образованието

Русија треба да се врати на десетгодишниот систем на школување, а исто така да го скрати и времетраењето на универзитетските студии со цел да се намали просечната возраст при раѓањето на првото дете, изјави за ТАСС претседателот на Руската комисија за демографија, заштита на семејството, децата и традиционалните семејни вредности на Јавната комора, Сергеј Рибаленко.

Соговорникот на агенцијата изјави дека просечната возраст на Русите кои стапуваат во брак во последните пет години се зголемила од 30,7 на 33,2 години. Рибаљенко е убеден дека овој тренд е поврзан со продолжувањето на периодот на социјално созревање.

„Во моментов, специјалистот поминува 11 години на училиште, 4 години на додипломски студии и 2 години на магистерски студии. Значи, тој студира вкупно 17 години. Да го додадеме на тоа периодот на адаптација на младиот специјалист, кој трае во просек три години. Како резултат на тоа, младиот специјалист почнува да размислува за децата дури на 27-годишна возраст“, истакна Рибаљенко.

„Образовниот процес може да се скрати на 15 години без губење на квалитетот“
Според него, образовниот процес може да се скрати на 15 години без губење на квалитетот. Основното и средното образование треба да се скрати на осум до десет години, а високото образование на пет години стручно оспособување.

Ова би им овозможило на Русите да влезат во зрелоста две години порано, според соговорникот на агенцијата. Експертот објасни како некои деца, како дел од проектот „Ефективно основно училиште“, ја совладуваат програмата за основно училиште за три години, наместо за четири.

„Спроведовме истражување и откривме дека нивото на знаење на учениците кои завршиле 10-то и 11-то одделение не се разликува“, нагласи Рибаљенко.

„Бројот на жители би можел да се преполови до крајот на векот“
Во 2024 година, бројот на раѓања во Русија падна на 1,22 милиони – најниско ниво од 1999 година – додека бројот на смртни случаи се зголеми за 3,3% на 1,82 милиони, според официјалните податоци. Бројот на жители минатата година беше околу 146 милиони.

Но, зголемувањето на бројот на раѓања не е единствениот руски предизвик. Војната во Украина го влоши недостигот на работна сила, бидејќи повредите и смртните случаи на бојното поле го намалија работоспособното население, а заминувањето на млади и високообразовани луѓе од земјата дополнително ја влошува ситуацијата.

Демографските прогнози се толку лоши што населението би можело да се преполови до крајот на овој век, според извештајот на тинк-тенкот Атлантски совет од август. Компаниите веќе го чувствуваат притисокот – работодавците сè повеќе вработуваат пензионери, па дури и тинејџери.

Недостатокот на работна сила ги зголеми платите и ја поттикна инфлацијата, дополнително оптоварувајќи ја економијата, која веќе беше нарушена од воените трошоци.

Само минатиот месец, министерот за економија Максим Решетников предупреди дека земјата е „на работ“ на рецесија.