Русија уапси истакнат опозиционер, наводно не платил кирија две години

Дмитриј Гудков, истакнат опозициски политичар и поранешен парламентарец, беше уапсен од руските службеници за спроведување на законот во вторникот, објави новинската агенција Тасс, дел од пошироката акција против критичарите на Кремlin.

Додека беше пратеник во долниот дом на парламентот, Гудков беше исклучен од партијата Единствена Русија во 2013 година за помагање во организирање протести против Кремљ. Подоцна тој се приклучи на либералната опозиција на Русија и му се спротивстави на претседателот Владимир Путин.

Во изјавата на социјалните мрежи претходно во вторникот, Гудков (41) рече дека полицијата пребарувала куќа во која престојувал и дека исто така цел биле поранешните и сегашните членови на неговиот тим.

Тасс, повикувајќи се на неименувани извори, објави дека Гудков бил притворен 48 часа под сомнение дека не исплатил долг според договорот за закуп на не-станбена зграда во периодот 2015-2017 година. Гудков може да биде затворен до пет години, доколку биде обвинет и прогласен за виновен од судот, соопшти Тасс.

Неговиот притвор е последниот во пошироката акција против противниците на Кремљ пред парламентарните избори во септември. Опозицискиот политичар Алексеј Навални е највисокиот критичар на Кремљ кој е затворен.

Гудков на платформата за социјални медиуми Телеграм порано во текот на денот објави дека причината што властите дошле за него е политичка. „Не ја знам формалната причина за ова“, напиша Гудков. „Но, вистинската (разумната) е јасна“.

Неговиот татко Генадиј, исто така критички настроен кон Кремљ, ги опиша претресите како „специјална операција за елиминирање на тимот на Гудков“.

Одделно, руските власти претходно во вторникот извршија рација во станот на опозицискиот активист Андреј Пивоваров, еден ден откако беше извлечен од авион и приведен.

Полицијата го отстрани Пивоваров, директор на Отворена Русија, сега веќе непостоечка опозициска група, поврзана со поранешниот нафтен магнат и критичар на Кремљ, Михаил Ходорковски, од авионот што требаше да полета кон полскиот главен град Варшава од аеродромот Пулково во Санкт Петербург доцна во понеделникот.

Неговиот тим рече дека полицијата го испрашала, извршила претрес во неговиот стан и отворила кривична постапка против него во вторникот за наводно кршење на руското законодавство за „непожелни организации“.

„Овие ситуации ни покажуваат дека тие се плашат од нас, а ние сме мнозинство“, стои на Твитер профилот на Пивоваров. (Ројтерс)