Русија сака да фати приклучок во развојот на вештачката интелигенција
Рускиот претседател Владимир Путин денеска предупреди дека не смее да му се дозволи на Западот да развие монопол во областа на вештачката интелигенција (ВИ), најавувајќи дека наскоро ќе биде објавена поамбициозна руска стратегија во оваа сфера.
Соединетите Американски Држави и Кина го предводат патот во развојот на вештачката интелигенција, технологија за која многу научници и светски лидери предвидуваат дека ќе го трансформира светот и ќе го револуционизира општеството, исто како што направија компјутерите на крајот на 20 век.
Москва, исто така, има амбиции да стане велесила со вештачка интелигенција, но нејзините напори моментално се одложени поради војната во Украина, која принуди многу талентирани научници да ја напуштат Русија и предизвика западни санкции кои го запреа увозот на високотехнолошки производи, пишува Ројтерс.
Говорејќи во Москва на конференција за вештачка интелигенција, заедно со извршниот директор на Сбербанк, Герман Греф, Путин рече дека е невозможно да се забрани вештачката интелигенција и предупреди дека би било опасно и неприфатливо да се дозволи западните платформи да развијат монопол во технологиите за вештачка интелигенција.
„Како прв чекор, во многу блиска иднина ќе биде потпишан претседателски декрет и ќе биде усвоена нова верзија на националната стратегија за развој на вештачка интелигенција“, рече Путин на конференцијата.
„Оваа стратегија ќе донесе значителни промени, вклучително и проширување на фундаменталните и применети истражувања во областа на генеративната вештачка интелигенција и големите јазични модели“, најави рускиот претседател.
Русија треба да направи законски и инвестициски промени за да го поттикне развојот на вештачката интелигенција, заклучи тој.