Русија фрли бомба врз луѓе што чекале пензии: 20 загинати
Брутален руски напад во село во Донецката област. Зеленски повикува на силни санкции
Руската војска фрли воздушна бомба врз селото Јарова во украинскиот регион Донецк. Најмалку 21 лице беше убиено, а исто толку беа повредени, објави началникот на регионалната воена администрација Вадим Филашкин. „Русите нападнаа луѓе додека тие чекаа пензии. Ова не е воена акција – ова е чист тероризам“, напиша тој. Спасувачи, лекари, полиција и локални власти работат на местото на настанот. Последиците се разјаснуваат. Меѓу повредените е и вработена во „Укрпошта“, која е хоспитализирана, соопшти компанијата.
Украинскиот претседател Володимир Зеленски објави видео од местото на бомбардирањето. На снимката се гледаат телата на загинатите и возило на „Укрпошта“ оштетено од експлозијата. „Отворено брутален руски воздушен напад врз селото Јарова во регионот Донецк. Право врз луѓе. Обични цивили. Во моментот кога се исплаќаа пензиите“, истакна тој.
Според Зеленски, ваквите убиства не треба да останат незабележани од светот. „Русите продолжуваат да уништуваат животи, но избегнуваат нови силни санкции, нови силни удари. Светот не треба да молчи. Светот не треба да биде неактивен. На Соединетите Американски Држави им е потребна реакција. На Европа ѝ е потребна реакција. На Г20 ѝ е потребна реакција. Потребни се силни акции за Русија да престане да носи смрт“, нагласи претседателот.
Руското Министерство за одбрана не го коментираше нападот врз Јарова. Селото се наоѓа на север од регионот Донецк. Пред војната, таму живееле 2.500 луѓе. Јарова беше под руска окупација во текот на летото 2022 година. Украинските вооружени сили ја вратија контролата врз селото на 19 септември истата година. Во тоа време, во Јарова останале да живеат 890 луѓе, вклучувајќи 80 семејства со деца.