Ројтерс: Путин одлучи да ја продолжи војната и покрај ултиматумот на Трамп
Рускиот претседател Владимир Путин е решен да ја продолжи војната со Украина и покрај ултиматумот на американскиот претседател Доналд Трамп и неговата закана за воведување 100-процентни царини за земјите што купуваат руска нафта, објавува Ројтерс, повикувајќи се на извори блиски до Кремљ.
Според нив, Путин ја одржува својата цел да освои цели четири региони на Украина – Донецк, Луганск, Запорожје и Херсон – кои беа инкорпорирани во Руската Федерација по „референдумите“ на крајот на 2022 година.
Путин, велат извори на Ројтерс, е уверен дека неговата армија победува на бојното поле и не верува дека новите американски санкции ќе имаат поголем ефект од бројните претходни пакети.
Тешко е да се замисли дека Кина ќе престане да купува руска нафта по наредба на Трамп, рече еден од соговорниците на агенцијата, додавајќи дека строгите мерки против руските суровини неизбежно ќе ги зголемат светските цени.
Според друг извор на Ројтерс, Кремљ се сомнева дека Трамп всушност ќе ја спроведе својата закана. „Тој се закануваше и претходно“, а потоа го смени својот став или не направи ништо, рече изворот.
Изворите велат дека генералите на Генералштабот му ветил на Путин дека одбраната на Украина ќе се распадне во рок од три месеци, а Кремљ не гледал смисла во запирањето на офанзивата што минатиот месец му донесе најголеми територијални добивки во годината – 502 квадратни километри во јули.
Кремљ го цени својот однос со Трамп, велат изворите, но приоритет на Путин останува војната. И тој „едноставно не може да си дозволи да ја заврши само затоа што Трамп го сака тоа“, рече изворот.
Двајца други извори изјавија за Ројтерс дека Путин не би сакал да го налути Трамп и разбира дека може да ја пропушти шансата да ги подобри односите со САД и Западот, но воените цели му се поважни.
Во исто време, Путин се надева дека Русија сè уште може да воспостави пријателство со САД и да ја продолжи трговијата со Западот, која беше прекината по инвазијата на Украина. Заканата со санкции од Трамп е „болна и непријатна“, но нема да биде катастрофа за руската економија, изјави еден од изворите за Ројтерс.
Според друг, Москва верува дека Трамп нема многу можности некако да изврши вистински притисок врз Русија.