Првиот Хаиќанец во крос-кантри скијање ги освои срцата на публиката

Стивенсон Саварт (25) влезе во историјата на Зимските олимписки игри станувајќи првиот спортист што некогаш го претставувал Хаити во крос-кантри скијање.

Младиот спортист го оствари својот олимписки сон во Милано и Кортина д’Ампецо, каде што привлече големо внимание од јавноста уште од самиот почеток.

Саварт беше и носител на знамето на Хаити на церемонијата на отворањето на Игрите, а потоа го имаше своето олимписко деби во машкиот скиатлон. Иако ја помина целта на 64-то место, беше пречекан со громогласен аплауз, а неговото емотивно поклонување пред публиката дополнително ги освои гледачите.

„Мојата цел е секогаш да дадам сѐ од себе и да ги поместам сопствените граници. Носењето на овој дрес е огромна гордост за мене и извор на голема среќа. Се обидуваме да бидеме симбол на нашата мала земја и да им дадеме надеж на луѓето, бидејќи минуваат низ тежок период. Сакаме да покажеме дека дури и малите земји можат да блеснат“, рече Саварт на француски јазик во видео објавено на Инстаграм.

Првиот спортист што некогаш го претставувал Хаити на Зимските олимписки игри бил алпскиот скијач Ричардсон Вијано во 2022 година. Тој завршил на 34-то место во слалом во тоа време, а својот втор олимписки настап го имал во Милано и Кортина.

„Ова е сон што се оствари. Сакам да покажам дека Хаити не е само земја на земјотреси и катастрофи“, рече Вијано во 2022 година.

Вијано бил голема инспирација за Саварт. Тој е роден на Хаити и пораснал во регионот Вогес во Франција, каде што почнал да скија како дете. Дебитираше на Светското првенство во јануари 2023 година, а оттогаш го претставувал Хаити на Светските првенства во 2023 и 2025 година.

Благодарение на стипендија од програмата за олимписка солидарност, Саварт успеал да ја обезбеди опремата и перформансите потребни за учество на Игрите во Италија. Програмата има за цел да им даде можност на спортистите од целиот свет да настапат на најголемата спортска сцена.

Како крос-кантри скијач кој го претставува Хаити, Саварт нагласува дека е важно за него да ги разбие предрасудите и да биде сфатен сериозно.

„Кога бев помлад, беше тешко да се биде единствениот црнец на скијачката патека. Луѓето те гледаат, понекогаш непријатно долго време. Но, со текот на времето учиш да го игнорираш тоа и да си го правиш своето“, рече Саварт, повикувајќи ги младите луѓе да веруваат дека сè е можно.