Протести на Палестинци против Хамас во северна Газа

Палестинци се приклучија на протестите во северниот дел на Газа, извикувајќи слогани против Хамас и повикувајќи на прекин на војната со Израел, што се опишува како најголем протест против милитантната група внатре на територијата од нападите на 7 октомври.

Видеата и фотографиите споделени на социјалните мрежи доцна во вторникот покажаа стотици луѓе, главно мажи, како извикуваат „Хамас надвор“ и „Терористи на Хамас“ во Беит Лахиа, каде што толпата се собра една недела откако израелската армија продолжи со интензивното бомбардирање на Газа по речиси два месеци примирје.

Протестите се одржаа пред индонезиската болница во северниот дел на Појасот Газа.

Некои демонстранти беа видени како носат транспаренти со слогани како „Стоп за војната“ и „Сакаме да живееме во мир“.

Најмалку еден апел да се приклучат на протестот кружеше на социјалната мрежа Телеграм.

„Не знам кој го организираше протестот“, изјави еден човек за агенцијата Франс прес. „Учествував да испратам порака во име на народот: Доста е со војната“, рече тој, додавајќи дека видел „членови на безбедносните сили на Хамас во цивилна облека како го разбиваат протестот“.

Мајди, друг демонстрант кој не сакаше да го каже целото име, рече дека „народот е уморен“.

„Ако решението е заминувањето на Хамас од власт во Газа, зошто Хамас не се откажува од власта за да го заштити народот?“ изјави тој за Франс прес.

Одделни снимки покажаа дека десетици луѓе во бегалските кампови Џабалија, во западниот дел на градот Газа, палат гуми и повикуваат на завршување на војната.

„Сакаме да јадеме“, скандираа тие.

Некои жители на Газа рекоа дека протестите би можеле да се прошират и на други делови на територијата разурната од војна, чии жители се исцрпени и трауматизирани по една и пол година конфликт.

Откако Хамас ги започна своите напади врз јужен Израел на 7 октомври, во Газа повремено избувнуваат скромни протести, при што демонстрантите бараат прекин на војната.

Многу од скандираните пароли во вторникот го евоцираа движењето Bidna N’eesh („Сакаме да живееме“), кое се појави за време на економските протести во Газа во 2019 година. Тие протести беа насилно задушени од Хамас, кој рече дека тие биле оркестрирани од неговиот ривал Фатах.

Израел редовно ги повикува луѓето во Газа да се мобилизираат против Хамас, кој е на власт на територијата од 2007 година.

Појасот Газа е уништен од повеќе од 17 месеци војна меѓу Израел и Хамас, при што хуманитарната ситуација повторно се влоши откако Израел го блокираше преминот на помош на територијата на 2 март во обид да ги принуди милитантите да ги ослободат израелските заложници.

Откако Израел ги продолжи своите воени операции во Газа, според Министерството за здравство, загинаа најмалку 792 Палестинци. (АФП)