Поранешен командант на морнарицата назначен за нов шеф на израелската тајна служба

Израелскиот премиер Бенјамин Нетанјаху одлучи да го назначи поранешниот командант на морнарицата, пензионираниот вицеадмирал Ели Шарвит за нов шеф на Шин Бет, соопшти кабинетот на премиерот. Шарвит беше назначен да го замени Ронен Бар, кој беше официјално разрешен од владата на почетокот од овој месец.

Бар останува на својата позиција поради привремената забрана против негово разрешување издадена од Високиот суд на правдата. Иако судот го замрзна разрешувањето на Бар, му дозволи на Нетанјаху да интервјуира кандидати кои ќе го заменат.

Нетанјаху интервјуираше седум кандидати, соопшти Кабинетот на премиерот. Кандидатурата на Шарвит сега ќе биде разгледана од комисијата за проверка пред да се донесе одлука пред владата.

Во соопштението од Кабинетот на премиерот за назначувањето на Шарвит се истакнува дека тој го водел дизајнот на поморските капацитети за одбрана на територијалните води на Израел и ги надгледувал сложените операции против Хамас, Хезболах и Иран.

„Шин Бет е организација со висока репутација“, соопштија од кабинетот на премиерот, „која претрпе тешка траума на 7 октомври“.

Нетанјаху, според соопштението од неговиот кабинет, „е уверен дека Шарвит е вистинската личност да ја води Шин Бет на патека што ќе ја продолжи славната традиција на организацијата“.

Како што објави „Тајмс оф Израел“, претходно оваа година, Шарвит, како извршен директор на „Елгри Еко енерџи“, објави статија во која ги критикуваше одлуките на американскиот претседател Доналд Трамп во однос на климата и промоцијата на фосилните горива. „Кратковидоста на Трамп испраќа шокантна порака до светот за непочитување на научната реалност, благосостојбата на човештвото и одговорноста кон идните генерации“, напиша тој.

Владата гласаше за разрешување на Бар претходно овој месец за време на масовните протести против овој потег.

Нетанјаху рече дека ја изгубил довербата во шефот на Шин Бет по нападот на Хамас на 7 октомври 2023 година, кога илјадници терористи го нападнаа јужниот дел на Израел, убивајќи околу 1.200 луѓе и зедоа 251 заложници, што ја предизвика војната во Газа.

Јавниот обвинител Гали Бахарав-Мијара, кого владата исто така се обидува да го отстрани, предупреди дека разрешувањето се соочува со правни потешкотии, делумно поради истрагата на Шин Бет за наводните врски меѓу најблиските соработници на Нетанјаху и Катар, кој го поддржува Хамас.

Бар вети дека ќе остане на својата позиција како шеф на Шин Бет додека не се вратат сите заложници од Газа и не се формира државна комисија за истрага за нападот на Хамас, што владата го одбива.

Судот закажа рочиште за 8-ми април за разгледување на претставките против разрешувањето на Бар.