По руското ветување следеше „колосален напад“ на Чернихив

Градоначалникот на Чернихив, Владислав Атрошенко, рече дека северниот украински град е под „колосален напад“ и покрај ветувањето на Москва дека ќе ги намали воените операции таму.

Во интервју за Си-Ен-Ен, Атрошенко го критикуваше тврдењето на Русија дека планира „драстично да го намали“ нејзиниот воен напад врз Чернихив и украинскиот главен град Киев.

Атрошенко рече:

„Ова е уште една потврда дека Русија секогаш лаже“.

Спротивно на изјавата на Русија дека ќе ги деескалираат нападите, Атрошенко рече дека непријателствата всушност се зголемиле во Чернихив откако беше изнесено тврдењето.

„Велат намалување на интензитетот, а тие всушност го зголемија интензитетот на нападите. Денеска имаме колосален напад на центарот на Чернихив. Дваесет и пет лица се ранети и сега се во болници. Сите тие се цивили.

Затоа, секогаш кога Русија ќе каже нешто, тоа треба внимателно да се провери“.

И гувернерот на областа Чернихив, Вијанчеслав Чаус, рече дека Русија продолжи да го напаѓа северниот украински град утринава.

Во изјава за Би-Би-Си, Чаус рече:

„Во моментов, додека зборуваме, можам да слушнам напади кои мислам дека се минофрлачки гранати. Чернихив и градот Нижин беа нападнати во текот на ноќта, а цивилните згради беа уништени.

Ние не им веруваме на [Русите] затоа што веќе видовме дека нема ниту еден момент кога нивните воени сили го одржуваат зборот“.

Неговите зборови дојдоа кога градоначалникот на градот, Владислав Атрошенко, рече дека руските напади врз Чернихив всушност се зголемени по тврдењето на Русија за намалување на операциите.