По одлуката за тенковите Русија нуди преговори со Украина

Руските власти ги обновија барањата за разговори со Украина откако САД и сојузниците одлучија за масовно снабдување со тенкови и оклопни возила за можна украинска офанзива на пролет.

Тезата дека Москва го одбива дијалогот е лага, изјави рускиот министер за надворешни работи Сергеј Лавров во четвртокот во интервју за Росија-24 и РИА Новости.

Според Лавров, Русија е подготвена за преговори и ќе продолжи да ги побива тврдењата за спротивното, а исто така „сака“ да заврши конфликтот со Украина, иако не сака тоа да се случи брзо. „Факторот време не е главниот“, рече Лавров.

Преговорите со Украина, чија прва и единствена рунда заврши неубедливо минатата пролет, се можни „без предуслови“, изјави во средата претседателката на Советот на Федерацијата, Валентина Матвиенко.

„Нашиот став е јасен, разбирлив и транспарентен. Подготвени сме за преговори. Но, ако режимот во Киев е подготвен за вистински преговори, а тоа не го гледаме “, објасни таа (цитат од ТАСС).

Според Матвиенко, САД се заинтересирани за ескалација на конфликтот и ја зголемуваат испораката на оружје за Украина, вклучително и офанзивно.

Киев ќе добие најмалку 140 тенкови во „првиот бран“ на испораки на оклопни возила, договорени минатата недела од сојузничките држави во Рамштајн, изјави во вторникот украинскиот министер за надворешни работи Дмитриј Кулеба.

„Тоа се ‘Леопард 2’, ‘Челинџер 2’, ‘М1 Абрамс’. И ние навистина сметаме на ‘Леклер’“, наведе тој. Според Кулеба, „тенковската коалиција“ веќе се состои од 12 земји и може да се надополни со нови членки.

Следниот пакет американска воена помош за Украина ќе вклучува ракетни системи со долг дострел (ГЛСДБ), со дострел до 150 километри.

Проектилите, чиј дострел е двојно поголем од оној на ХИМАРС-ите што им се достапни на вооружените сили на Украина, ќе ѝ овозможат на украинската армија да нападне, вклучително и на Крим – од линијата на фронтот на бреговите на Днепар.

По неколку месеци сомнеж и страв дека нападот на Крим ќе ескалира, администрацијата на Бајден конечно почнува да признава дека на Украина ѝ се потребни средства за да го нападне полуостровот, кој стана клучен логистички центар за руската армија, изјавија претставници на Белата куќа за „Њујорк тајмс“.

Според нив, способноста на украинската армија да ја покаже ранливоста на Крим ќе ја зајакне позицијата на Киев во идните преговори. Дополнително, според Соединетите Држави е намалена заканата од употреба на нуклеарно оружје.

На претседателот Владимир Путин можеби ќе му треба повеќе „топовско месо“ за да се спротивстави на офанзивата на вооружените сили на Украина, која се подготвуваше со учество на генералите на Пентагон, – уште 200.000 луѓе би можеле да бидат мобилизирани како дел од „вториот бран“ регрутирање во следните месеци, изјавија за Си-Ен-Ен извори запознаени со американското разузнавање.

Путин сѐ уште не донел одлука и, според извори на Си-Ен-Ен, тој разбира колку мобилизацијата е непопуларна во општеството. Есенскиот бран предизвика протести во некои региони и покрена бран на емиграција што однесе стотици илјади млади луѓе надвор од земјата.